راچڵەکین- کامەران کەریم

بەڕێوەبەری ئەوقافی هەڵەبجە رایدەگەیەنێت، بە پابەندبوون بە رێنماییە تەندروستییەکان نوێژی جەژن لە مزگەوتەکان ئەنجامدەدرێت.

ئارام شێخ جەمال، ئەمرۆ پێنج شەممە 21-5-2020 لە لێدوانێکدا بە راچڵەکین-ی ڕاگەیاند:" دوامان لە مامۆستایانی ئاینی کردووە کە رۆژانە رێکار و رێنماییە تەندروستییەکان لە ناو مزگەوتەکان جێبەجێ بکرێت بۆ زیاتر پاراستنی تەندروستی گیانی نوێژ خوێنان، لە رێگەی بڵندگۆی مزگەوتەکانەوە داوا لە هاووڵاتییان و نوێژ خوێنان بکرێت کە پابەندی رێنمایییە تەندروستیەکان بن." 

باسی لەوەشکرد :" بە هۆی راگرتنی قەدەغەی هاتوچۆ لە رۆژانی جەژنی رەمەزان داوامان لە مامۆستایان کردووە ئامۆژگاری هاووڵاتیان بکەن کە لە ماڵەکانیان بمێنەوە، لە رێگای تەلەفون و کورتە نامە و تۆڕە کۆمەڵایەتییەکان پیرۆزبایی لە دۆست و ئازیزانیان بکەن."

دەشڵێت:" نوێژی جەژن سوننەتێکە و موسوڵمانان دەتوانن لە ماڵەکانی خۆیاندا ئەو سوننەتە بە ئەنجام بگەیەنن، ئەگەر نا مامۆستایانمان ئاگادارکردووەتەوە بە پێی رێنماییەکان نوێژی جەژن لە مزگەوتەکاندا ئەنجام بدەن."