راچڵەكین -
سەرۆكایەتی هەرێمی كوردستان، ناوەڕۆكی كۆبوونەوەی نێوان نێچیرڤان بارزانی و مەزڵوم عەبدی ئاشكرا دەكات و رایدەگەیەنێت: هەردوولا هاوڕا بوون لەسەر كاری هاوبەش و پێكەوەیی لەنێو پێكهاتەكانی سووریادا بۆ پاراستنی ئارامی و سەقامگیری و بەرەنگاربوونەوەی مەترسی و ئاڵنگارییەكان.
شەوی ڕابردوو 2025/4/23 لە هەولێر، نێچیرڤان بارزانی، سەرۆكی هەرێمی كوردستان، پێشوازیی لە جەنەراڵ مەزڵوم عەبدی، فەرماندەی هێزەكانی سووریای دیموكرات (هەسەدەی) كرد.
بەگوێرەی راگەیەندراوێكی سەرۆكایەتی هەرێمی كوردستان، لە كۆبوونەوەكەدا دوایین پێشهاتەكانی دۆخی سووریا و پەیوەندییەكانی هێزەكانی سووریای دیموكرات و لایەنە سیاسییە كوردییەكان لە سووریا لەگەڵ حكوومەتی سووریا تاوتوێ كران و دەربارەی مەترسییەكانی تیرۆر و بەرەنگاربوونەوەی هەڕەشەكانی داعش، بیروڕایان گۆڕییەوە.
هەردوولا جەختیان لە گرنگیی هاوبەشی و بەشداریی كورد و تەواوی پێكهاتەكانی سووریا لە دەسەڵات و بەڕێوەبردنی وڵاتەكەدا و مسۆگەركردنی مافەكانی هەمووان كردەوە، هەروەها هاوڕا بوون لەسەر كاری هاوبەش و پێكەوەیی لەنێو پێكهاتەكانی سووریادا بۆ پاراستنی ئارامی و سەقامگیری و بەرەنگاربوونەوەی مەترسی و ئاڵنگارییەكان.
پێویستیی یەكڕیزی و تەبایی لەنێو هێز و لایەنە كوردییەكانی سووریادا وەك گارانتییەك بۆ بەدیهێنانی داوا و مافە ڕەواكانی كورد لەو وڵاتە، دۆخی كامپی هۆڵ و ڕۆڵی هاوپەیمانیی نێودەوڵەتی لە سووریا بۆ ڕووبەڕووبوونەوەی داعش، تەوەرێكی دیكەی كۆبوونەوەكە بوو.
