راچڵەكین -

لەناوچەیەكی سووریا تەرمی پێنج كەس دۆزرانەوە كە ئەندامی یەك خێزانن و پێشتر لەلایەن گروپێكی چەكدارەوە رفێندرابوون.

روانگەی سووری بۆ مافەكانی مرۆڤ بڵاویكردەوە، دوای ئەوەی لە گەڕەكێكی شاری حمس لە سووریا، گروپێكی چەكداری دەمامكدراو، هەڵیانكوتایە سەر ماڵێك و پێنج ئەندامی خێزانێكیان رفاند، تەرمەكانیان لەنزیك نەخۆشخانەیەك دۆزرانەوە.

هەرچەندە تائێستا بەفەرمی هۆكاری كوژرانی ئەندامانی ئەو خێزانە ئاشكرا نەكراوە، بەڵام بەپێی زانیاریەكان، خێزانەكە عەلەوین و پێدەچێت بەهۆكاری ناكۆكی تایفی كوژرابن.

بەپێی ئامارەكانی روانگەی سووری بۆ مافەكانی مرۆڤ، لە سەرەتای ئەمساڵەوە تائێستا،  470 كەس كە زۆربەیان عەلەوین، بەهۆی ناكۆكی تایفییەوە لەسەرانسەری سووریادا كوژراون، زۆرترین قوربانییەكانیش كە لەلایەن گروپە چەكدارەكانەوە كوژراون، نیشتەجێی پارێزگای حەمس-ی رۆژئاوای سووریان.