ڕاچڵەکین سپۆرت -

 

ڕیال مەدرید لە قۆناغێکی سەختی ئەم وەرزەدا بەدەست قەیرانێکی نوێوە دەناڵێنێت، چونکە لەم ماوەیەدا خۆی ئامادە دەکات بۆ ئەنجامدانی چەندین یاری چارەنووسساز لە پاڵەوانێتییە جیاوازەکاندا.

ڕەنگە ڕیال مەدرید پێویست بکات پشت بە گۆڵپارێزی سێیەمی خۆی ببەستێت، بە لەبەرچاوگرتنی ئەو گومانانەی لە دەوری تیبۆ کۆرتوا و ئەندری لونین هەیە.

ئەمەش لە کاتێکدایە، یانەی ڕیال مەدرید خۆی ئامادە دەکات بۆ ئەوەی شەممە لە لالیگا میوانداری یانەی ڤالێنسیا بکات لە یاریگای بێرنابیۆ، دواتر ڕۆژی سێشەممە لە یاری چوونی قۆناغی چارەکی کۆتایی چامپیۆنزلیگ ڕووبەڕووی ئارسیناڵ دەبێتەوە.

کۆرتوا لەکاتی ئەنجامدانی یاریی لەگەڵ هەڵبژاردەی بەلجیکا لەکاتی پشووە نێودەوڵەتییەکانی ئەم دواییەدا تووشی پێکانی ماسولکەکانی بوو، دواتر لە یاریی خول بەرامبەر لیگانێس و یاری جامی شای ئیسپانیا بەرامبەر ڕیال سۆسیداد بەشداری نەکرد. گومان هەیە لەسەر ئامادەبوونی بۆ یارییەکانی بەرامبەر ڤالێنسیا و ئارسیناڵ.

بەگوێرەی تۆڕی "ریلیڤۆ"ی ئیسپانی، لونین لە قۆناغی پێش کۆتایی بەرامبەر ڕیال سۆسیداد تووشی پێکان بووە، لەکاتێکدا ڕەنگە هێشتا بەرامبەر ڤالێنسیا بەشداری بکات، بەڵام سبەی بڕیاری کۆتایی دەدرێت.

ئەگەر نەتوانێت بگاتە ئەو یارییە، ئەوا ڕیال مەدرید دەبێت پشت بە فران گۆنزالێزی تەمەن 19 ساڵ ببەستێت، کە هەرگیز بۆ تیپی یەکەم یاری نەکردووە.

فران لە 16 یاریدا لەگەڵ تیپی لاوانی مەدرید بەشداری کردووە و 19 گۆڵی لێکراوە، لە 3 یاریشدا کلین شیتی کردووە.