راچڵەكین -
سوپای ئیسرائیل جموجۆڵە سەربازییەكانی لەناو خاكی سووریا فراوانتر دەكات و هاتووچۆكردنیش لەناوچەیەكی باشووری ئەو وڵاتە قەدەغە دەكات.
میدیاكانی ناوخۆی سووریا بڵاویانكردەوە، ئەمڕۆ پێنجشەممە، سوپای ئیسرائیل پەیامێكی دەستنووسی لە شارۆچكەیەكی سەر بە پارێزگای دەرعای باشووری سووریا بڵاوكردەوەو تێیدا هۆشداریی بە دانیشتووانەكەی داوە هیچ كەسێك بە چەكەوە بۆی نییە هاتووچۆ بكات، هۆشداریشی داوە كە هەر چەكدارێك دەبێتە ئامانجی هێزەكانیان و تەقەی لێدەكرێت.
پەیامەكەی سوپای ئیسرائیل لەدوای رووبەڕووبونەوەیەكی چەكداری دێت لەنێوان هێزەكانیان و چەند چەكدارێكی شارۆچكەی كویا لە گوندەوارەكانی دەرعا، كە بووە هۆی كوژرانی ژمارەیەك چەكدار و بەشێكی زۆر لە دانیشتووانی شارۆچكەكەش ناچاربوون ماڵ و حاڵیان جێبهێڵن.
بەگوێرەی زانیارییەكان، سوپای ئیسرائیل لەسنووری پارێزگای دەرعا، چەند پێگەیەكی سەربازیی دروستكردووەو هێزێكی زۆریشی لەناوچەكە جێگیر كردووە.