راچڵەكین -
گەشتوگوزاری هەڵەبجە هۆشداریی لەبارەی ئەو بەلەمانە دەدات كە لەناوچە گەشتیارییەكانی سەر دەریاچەی سیروان دانراون و رایدەگەیەنێت: هیچ مەرجێكی سەلامەتی و تایبەتمەندیی گەشتیارییان تێدا نییەو ناتوانن مۆڵەتیان بۆ دەربكەن.
ئەمڕۆ پێنجشەممە، بەڕێوەبەرایەتی گشتی گەشتوگوزاری پارێزگای هەڵەبجە، روونكردنەوەیەكی لەبارەی ئەو بەلەمانە بڵاوكردەوە كە لە چەند ناوچەیەكی گەشتیاری وەك ( هانەژاڵە و ئیمامی زامن) لەسەر دەریاچەی سیروان كاردەكەن و بۆ گواستنەوەی گەشتیار بەكاردەهێنرێن، تێیدا هاتووە، ئەو بەلەمانەی لەو ناوچانە بەكاردێن ئێمە وەك بەڕێوەبەرایەتی گشتی گەشتوگوزاری هەڵەبجە نە ئێستا و نە پێشتریش بە بەلەمی گەشتیاریمان دانەناون و چەندین جار سەردانمان كردوون، هیچ مەرجێكی سەلامەتی و تایبەتمەندیی گەشتیارییان تێدا نییە و گەشتیار دەبێت هۆشیاری پێویستی هەبێت بەبێ بوونی هێلەكی خۆپارێزی و چوپی رزگاركردن و چەتر، ژیانی خۆی و ماڵ و منداڵی نەخاتە مەترسییەوە.
گەشتوگوزاری هەڵەبجە ئاماژەی بەوەشكردووە كە هیچ كات سەبارەت بەو كێشەیە خەمسارد نەبوون و ساڵێك لەمەوبەر دركیان بەو مەترسییە كردووە و گفتوگۆ و رێنمایی پێویستیش دراوە بە خاوەن بەلەمەكان كە پێویستە گەشتیار سەرنەخەن، ئەگەر سەریان خست دەبێت چوپی خۆ رزگاركردن و هێلەكی خۆپارێزی بەكاربهێنرێت.
لە بەشێكی دیكەی روونكردنەوەكەدا هاتووە، "لەبەر ئەوەی ئەو بەلەمانە تایبەتمەندیی بەلەمی گەشتیاریی تێدا نییە، وەك گەشتوگوزار ناتوانین مۆڵەتیان بۆ دەربكەین، بۆ هەمان مەبەست لە بەرواری ( ٢٣/٤/٢٠٢٤ ) بە نوسراوی ژمارە ( ٣٥ ) داوامان لە پارێزگاری هەڵەبجە كرووە كە لیژنەیەك بۆ چارەسەری ئەو بابەتە پێكبهێنێت، ئێمە پێمان وابووە ئەو بەلەمانە بۆ كاری راوە ماسی و گواستنەوەی كەلوپەل بەكاردێن و هیچ مەرجێكی سەلامەتی تێدا نییە و پێویستە لەلایەن گەشتوگوزار و بەرگریی شارستانی و پۆلیس و قائیمقامیەت هەموو ڕێكارەكانی خۆپارێزی بگیرێتەبەر و بكرێت بە مەرج و لە ئەگەری پابەند نەبوون بە ڕێنماییەكان، بەلەمەكان دەستیان بەسەردا بگیرێت و سزای دارایی بدرێن.
