راچڵەكین -
هەنگاریا دوای پێشوازیكردنی لە سەرۆكوەزیرانی ئیسرائیل كە لەلایەن دادگای تاوانی نێودەوڵەتییەوە فەرمانی دەستگیركردنی بۆ دەركراوە، بڕیاریدا لە ئەندامیەتی ئەو دادگایە بكشێتەوە.
ئەمڕۆ پێنجشەممە، بنیامین نەتانیاهۆ، سەرۆكوەزیرانی ئیسرائیل، سەردانێكی فەرمی بۆ هەنگاریا ئەنجامدا و لەلایەن ڤیكتۆر ئۆربان، سەرۆكوەزیرانی ئەو وڵاتەوە پێشوازی لێكرا، سەردانەكەش كاردانەوەی دادگای تاوانی نێودەوڵەتی (لاهای) لێكەوتەوە، بەو پێیەی دادگاكە بە تاوانی ئەنجامدانی تاوانی دژ بە مرۆڤایەتی لە كەرتی غەززە، فەرمانی دەستگیكردنی بۆ نەتانیاهۆ دەركردووەو پێویستە لەسەر سەرجەم وڵاتانی ئەندامی ئەو دادگایە، پابەندی بڕیارەكە بن و فەرمانی دەستگیركردنەكە جێبەجێ بكەن لەكاتی هاتنی نەتانیاهۆ بۆ خاكی وڵاتەكانیان.
سەرۆكوەزیرانی هەنگاریا، كە پێشتر دژایەتی خۆی بۆ بڕیارەكەی دادگای لاهای دەربڕیبوو، وەك تەحەدایەكیش بەفەرمی بانگهێشتانەكەی ئاڕاستەی سەرۆكوەزیرانی ئیسرائیل كردبوو بۆ سەردانكردنی هەنگاریا، لە پەیامێكدا بڵاویكردەوە، هەنگاریا لە دادگای تاوانی نێودەوڵەتی دەكشێتەوەو چیتر وەك ئەندامی ئەو دادگایە نامێنێت.