راچڵەكین-

وەزیری بەرگری ئیسرائیل بە توندی هۆشداری دەدات بە ئەحمەد شەرع-ی سەرۆكی دەسەڵاتی نوێی سوریا، ئەگەر بێتو هەڕەشە لە بەرژەوەندییەكانی ئاسایشی ئیسرائیل بكرێت.

ئەمڕۆ پێنجشەممە 3ی نیسانی 2025 یسرائیل كاتز-ی وەزیری بەرگری ئیسرائیل بەزمانێكی توند هۆشداری بەئەحمەد شەرع-دا، كە ئەو بەنازناوەكەی پێشووی " ئەبومحەمەد جۆلانی" ناوی هێنا و رایگەیاند، ئەگەر بێتو سوریا رێگا بە هێزە دژەكانی ئیسرائیل بدات كە بێنە خاكی ئەو وڵاتە ئەوا " باجێكی قورس" دەدات.

ئەوەش لەكاتێكدا دێت، سوپای ئیسرائیل بڵاویكردووەتەوە، شەوی رابردوو هێرشی ئاسمانی كردووەتە سەر دوو بنكەی ئاسمانی و چەند پێگەیەكی ژێرخانی سەربازی سوریا لەشارەكانی دیمەشق، حمس، حەما و درعا.

بڕیاریشە سەركردە سەربازییەكانی ئیسرائیل كۆبوونەوەیەكی فراوان ئەنجامبدەن لەبارەی " بوونی توركیا لەسوریا".

رۆژنامەی مەعاریف-ی ئیسرائیلی بڵاویكردووەتەوە، لەكۆبوونەوە چاوەڕوانكراوەكەدا هەریەك لە ئیسرائیل كاتس- وەزیری بەرگری و ئیال زامیر- سەرۆك ئەركان و بەرپرسانی تری سەربازی ئیسرائیل بەشداری دەكەن.

كۆبوونەوە سەربازییەكەی ئیسرائیل لەچوارچێوەی نیگەرانییەكانی ئەو وڵاتە دێت لەبەرامبەر هەوڵەكانی توركیا بۆ فراوانكردنی هەژموونی خۆی لەسوریا. هاوكات چەند سەرچاوەیەك جەختیان لەوەكردووە، ئیسرائیل نایەوێت بەریەككەوتنی راستەوخۆی لەگەڵ توركیا هەبێت، بەڵام دەیەوێت لەرێی زنجیرە هێرشێكی ئاسمانی، پەیامێك بۆ توركیا بنێرێت.

رۆژنامەی مەعاریف بڵاویكردووەتەوە، تەلئەبیب لەو بڕوایەدایە، ئەنقەرە بە هاوكاری رژێمی نوێی سوریا، دەیەوێت بوونی سەربازی بەردەوامی هەبێت لەو وڵاتە، ئەوەش " دەبێتە هەڕەشە لەسەر هاوسەنگی هەرێمایەتی".

ئەوەش روونكراوەتەوە، ئیسرائیل دەیەوێت باشوری سوریا بەتەواوی لە چەك دابماڵرێت، تا گرفت بۆ  فڕینی فڕۆكە سەربازییەكانی ئەو وڵاتە لەباشوری سوریا دروست نەبێت.