راچڵەكین -
سوپای ئیسرائیل هێرشێكی گەورەی ئاسمانی دەكاتە سەر سووریا و پێگەیەكی گرنگ لە دیمەشق-ی پایتەخت و فڕۆكەخانەیەكی سەربازی بۆردومان دەكات.
میدیاكانی ناوخۆی سووریا بڵاویانكردەوە، ئەمشەو فڕۆكە جەنگییەكانی ئیسرائیل هێرشیان كردە سەر دیمەشق-ی پایتەخت و شاری حەما، لەگەڵ هێرشەكەدا دەنگی تەقینەوەیەكی بەهێز لە رۆژئاوای دیمەشق بیسترا.
هێرشەكە ئاسمانییەكەی سەر شاری دیمەشق، ناوەندی توێژینەوەی زانستیی سووریای كردە ئامانج، كە دەكەوێتە نزیك ناوچەی نیشتەجێبوونی بەرزە، لەشاری حەما-ی باكووری رۆژئاوای ئەو وڵاتەش، فڕۆكەكانی ئیسرائیل فڕۆكەخانەی سەربازیی شارەكەیان بۆردومانكرد.
تائێستا هیچ ئامارێك بە ژمارەی كوژراوو بریندارانی ئەو دوو هێرشە ئاسمانییەكە بڵاونەكراوەتەوە.
لەدوای كەوتنی رژێمی بەشار ئەسەد و هاتنە سەر حوكمی گروپە چەكدارەكانی ئەو وڵاتە بە سەرۆكایەتی ئەحمەد شەرع، تائێستا سوپای ئیسرائیل دەیان هێرشی ئاسمانیی كردووەتە سەر ئەو وڵاتە چەندین پێگەی سەربازی و كۆگای چەك و تەقەمەنی لەناوبردووە.