راچڵەكین -

پارێزگاری دهۆك روونكردنەوە لەبارەی رووداوەكەی ئەمڕۆی شارەكە دەدات كە تۆمەتبارێك بە چەقۆ هێرشیكردە سەر مەراسیمی جەژنی ئەكیتۆی كریستیانەكان و سێ كەسی بریندار كرد، دەشڵێت: ئەم رووداوە پێكەوەژیان لە دهۆك تێكنادات.

عەلی تەتەر، پارێزگاری دهۆك لە كۆنفرانسێكی رۆژنامەوانیدا رایگەیاند: بەتوندی ئیدانەی هێرشكردنە سەر ئاهەنگگێڕانی جەژنی ئەكیتۆ دەكەین كە بەهۆیەوە سێ كەس بە چەقۆ بریندار بوون.

ئەمڕۆ سێشەممە 1ی نیسان، لەكاتێكدا ژمارەیەكی زۆر لە كریستیانەكانی شاری دهۆك بەبۆنەی جەژنی ئەكیتۆ، سەرقاڵی ئاهەنگگێڕان بوون، تۆمەتبارێك بە چەقۆ هێرشیكردە سەریان و سێ كەسی بریندار كرد، كە رەوشی تەندروستی یەكێك لە بریندارەكان ناجێگیرە.

لەدوای رووداوەكە تۆمەتبارەكە، كە ناسنامەكەی ئاشكرا نەبووە، لەلایەن چەند هاووڵاتییەكەوە دەستگیركرا و رادەستی هێزە ئەمنییەكان كرا.

پارێزگاری دهۆك وێڕای ئیدانەكردنی هێرشەكە، رایگەیاند: ئەم رووداوە پێكەوەژیان لە دهۆك تێكنادات، لێكۆلاینەوەش لەگەڵ تۆمەتبارەكە لەلایەن هێزە ئەمنییەكانەوە بەردەوامەو دواتر ئەنجامەكەی بۆ رای گشتی بڵاودەكرێتەوە.