راچڵەكین -

ئەنجومەنی هەردوو گەڕەكی كوردنشینی حەلەب (شێخ مەقسودو ئەشرەفیە) لەگەڵ دەسەڵاتدارانی سووریا گەیشتنە رێككەوتن بۆ كۆتایی هاتنی دیاردەی چەكداری لەو دوو گەڕەكە و پاراستنی تایبەتمەندی كۆمەڵایەتی و كلتوری دانیشتووانەكانی.

روانگەی سووری بۆ مافەكانی مرۆڤ، دەقی ئەو رێككەوتنەی بڵاوكردەوە كە لەنێوان ئەنجومەنی گەڕەكەكانی شێخ مەقسود و ئەشرەفیەی شاری حەڵەب، لەگەڵ دەسەڵاتدارانی دیمەشق واژۆكراوەو لە 14 خاڵ پێكهاتووە، كە ئامانج لێی پتەكردنی پێكەوەژیانی هاوبەش و پاراستنی دانیشتوان و رێگریكردنە لە دیاردەی چەكداری و رێكخستنی ئاسایشی ناوخۆ.

رێككەوتنە لە چوارچێوەی هاوكاری نێوان ئەنجومەنی مەدەنی گەڕەكەكان و ئەو لیژنەیەدا دێت كە لەلایەن سەرۆكی سووریاوە راسپێردراوە، بە ئامانجی جێبەجێكردنی رێككەوتنەكەیان لەگەڵ هێزەكانی سوریای دیموكرات (هەسەدە).

دەقی رێككەوتنەكە:

لەسەر بنەمای خواستی بەرەوپێشبردنی پێكەوەژیان و پاراستنی ئاشتی مەدەنی و گەیشتن بە ئامانجەكانی شۆڕشی سوریا بە ئازادی و شكۆو، لەسەر بنەمای باوەڕەبون بەوەی كۆدەنگی لە نێوان پێكهاتە جیاوازەكانی گەلی سوریا، باشترین رێگایە بۆ روبەڕوبونەوەی ئاستەنگەكانی ئێستا، بەم شێوەیە رێككەوتن كرا:

 1- گەڕەكی شێخ مەقسود و ئەشرەفییە كە زۆرینەی دانیشتوانی كوردن، گەڕەكی شاری حەلەبن و لە ڕووی كارگێڕییەوە سەر بە شاری حەلەبن، پاراستن و رێزگرتن لە تایبەتمەندی كۆمەڵایەتی و كلتوری دانیشتوانی ئەم دوو گەڕەكە بۆ پێشخستنی پێكەوەژیانی ئاشتیانە زۆر گرنگە.

2- بڕگەكانی ئەم رێككەوتنە كاتییە جێبەجێ دەكرێن، تا ئەوكاتەی لیژنە ناوەندییە هاوبەشەكان لەسەر چارەسەری هەمیشەیی رێكدەكەون.

3- وەزارەتی ناوخۆ بە هاوكاری هێزەكانی ئاسایشی ناوخۆ بەرپرسیارە لە پاراستنی دانیشتوانی ئەو دوو گەڕەكە و، رێگریكردن لە هەر جۆرە دوژمنكاری و هەراسانكردنێك بەرامبەریان.

4- بۆ پاراستنی ئاسایشی كۆمەڵایەتی و سەلامەتی خەڵكی سڤیل، دیاردەی چەكداری لەو دوو گەڕەكە قەدەغەیە، چەك تەنها بە هێزەكانی ئاسایشی ناوخۆ دەبێت لە هەردوو گەڕەكەكەدا.

5- بەربەستە خۆڵییەكان لەسەر رێگا گشتیەكان لادەبرێن، تەنها بەربەستە سەرەكییەكان دەمێننەوە، لەژێر چاودێری ئاسایشی ناوخۆی وەزارەتی ناوخۆ، تا ئاسایش و سەقامگیری بەتەواوی لە هەردوو گەڕەكەكەدا فەراهەم دەبێت.

6- هێزە سەربازییەكان بە چەكەكانیانەوە لە دوو گەڕەكەكەوە دەكشێنەوە بۆ ناوچەی رۆژهەڵاتی فورات.

7- لە هەریەك لە گەڕەكی ئەشرەفیە و شێخ مەقسود دوو ناوەندی ئاسایشی ناوخۆ رێكدەخرێن.

8- ئازادی هاتوچۆ بۆ دانیشتوانی ئەو دوو گەڕەكە مسۆگەر دەكرێت، هیچ كەسێك دەستگیرناكرێت ئەگەر پێش رێككەوتنەكەش داواكراو بووبێت، دەستی لە ڕشتنی خوێنی سوریەكاندا نەبێت.

9- لیژنەیەكی هەماهەنگی پێكدەهێنرێت بۆ ئاسانكاری هاتوچۆ لە نێوان شاری حەلەب و ناوچەكانی باكور و رۆژهەڵاتی سوریا.

10- لیژنە لە هەردوو گەڕەكەكە پێكدەهێنرێت بۆ جێبەجێكردنی رێككەوتنەكە.

11- دامەزراوە مەدەنییەكانی ئەو دوو گەڕەكە بە هەماهەنگی لەگەڵ دامەزراوە مەدەنییەكانی دیكە كاردەكەن، خزمەتگوزارییان پێشكەش دەكەن بەبێ جیاكاری لە گەڕەكەكانی تری حەلەب لە رێگەی دوو لقی شارەوانییەكانەوە، كە دەكەونە ئەو دوو گەڕەكە.

12- پاككردنەوەی زیندانەكان لەلایەن هەردوولاوە لە پارێزگای حەلەب و، ئاڵوگۆڕكردنی هەموو ئەو زیندانیانەی دوای ئازادكردنی سوریا بەدیل گیراون.

13- گەڕەكەكان مافی نوێنەرایەتی تەواو و دادپەروەرانەیان پێدەدرێت لە ئەنجومەنی پارێزگای حەلەب، هەروەها لە ژوورەكانی بازرگانی و پیشەسازی و سەرجەم بوارەكانی تر، بەپێی یاساكانی حوكمڕانی.

14- پاراستنی دامەزراوە خزمەتگوزاری و كارگێڕی و پەروەردەیی و شارەوانییەكان و ئەنجومەنە ناوخۆییەكانی ئێستا لە هەردوو گەڕەكەكەدا، تا ئەو كاتەی لیژنە ناوەندییە هاوبەشەكان لەسەر چارەسەرێكی بەردەوام رێكدەكەون.