راچڵەكین-

ماڵپەری شەفافیەت بۆ چاودێری و رێكخستنی داهاتە نانەوتییەكانی سلێمانی، هەڵەبجە و هەردوو ئیدارەی راپەڕین و گەرمیان، داهاتی ئەم هەفتەیەی بڵاوكردەوە.

بەگوێرەی ئەو داتایانە بێت كە ماڵپەری شەفافیەت بڵاویكردوونەتەوە، داهاتی نانەوتی سلێمانی، هەڵەبجە و هەردوو ئیدارەی راپەڕین و گەرمیان لە 22 تا 28-3-2025 ، بڕی (8) ملیارو (727)ملیۆن و (389)هەزار و (70)دینار بووە، لە (75%)ـی داهاتەكە نەختینەیە و (25%)ی بەشێوەی چەك بووە .

داهاتەكە بەراورد بە هەفتەی رابردووتر بەرێژەی 67.428% كەمیكردووە كە دەكاتە بڕی 18 ملیار دینار، بەجۆرێك داهاتی نانەوتی لە15 تا 21 -3-2025 بریتیی بووە لە (26) ملیارو (793) ملیۆن و (992) هەزارو (133) دینار.

هاوكات داهاتی مانگی ئادار بەراورد بەداهاتی مانگی شوبات نزیكەی 6.13% كەمیكردووە، بەجۆرێك داهاتی مانگی شوبات 62 ملیارو 804 ملیۆن و 827 هەزارو 383 دینار بووە، بەڵام داهاتی مانگی ئادار 58 ملیارو 954 ملیۆن و 792 هەزارو 370 دینار بووە.

ماڵپەڕی شەفافیەت لە 8 بەش پێكدێت و لەلایەن نووسینگەی قوباد تاڵەبانی جێگری سەرۆكی حكومەت سەرپەرشتی دەكرێت و دروشمەكەی "بە سیستمكردن و دیجیتاڵكردنی خزمەتگوزارییەكانی هاووڵاتییان لە دامودەزگاكانی حكومەت"ـە.