راچڵەكین-

وەزیری دەرەوەی ئێران دەڵێت، وڵاتەكەی ئامادەیە دانووستانی ناڕاستەوخۆ  لەبارەی بەرنامە ئەتۆمییەكەی لەگەڵ ئەمریكا ئەنجامبدات، بەو مەرجەی لەژێر هیچ فشارو هەڕەشەیەكدا نەبێت.

ئەمڕۆ دووشەممە 24ی ئاداری 2025 عەباس عیراقچی رایگەیاند:" رێگا لەبەردەم دانووستانی ناڕاستەوخۆ واڵایە" لەهەمان كاتدا رەتیكردەوە تاران بچێتە ژێرباری دانووستانی راستەوخۆ لەگەڵ واشنتۆن تائەو كاتەی هەڵوێستی ئەمریكا بەرامبەر ئێران گۆڕانكاری بەسەردا دێت.

عیراقچی ووتی، ئەو لێدوان و تۆمەتانەی رۆژانە ئاڕستەیان دەكرێت، نابنە هۆكارێك بۆ ئەوەی دانووستانی راستەوخۆ ئەنجامبدەین.

پێشتر ستیڤ ویتكۆڤ، نێردەی ئەمریكا بۆ خۆرهەڵاتی ناوەڕاست رایگەیاندبوو، نامەكەی دۆناڵد ترەمپ-ی سەرۆكی ئەمریكا بۆ عەلی خامنەیی، رێبەری باڵای ئێران بۆ ئەنجامدانی رێكەوتنێكی نوێ لەبارەی بەرنامە ئەتۆمییەكەی ئەو وڵاتە، هەوڵێكە بۆ خۆ لادان لەكردەی سەربازی:" پێویست ناكات هەموو كێشەیەك بەرێگای سەربازی چارەسەر بكرێت."

وتیشی:" پەیامەكەمان بۆ ئێران ئەوەیە، باپێكەوە دابنیشین و گفتوگۆ بكەین، بزانین لەرێی وتووێژو دانووستانەوە چیمان پێدەكرێت، ئێمە ئامادەین بۆ ئەو كارە، ئەگەر بێتو ئەو هەنگاوەش سەرنەگرێ ئەوا بژاردەكانی تر باش نابن."