راچڵەكین-

پزیشكێكی نەخۆشخانەی مێرگەسۆر، لەكاتی بەهاناوەچوونی نەخۆشێك لەناحیەی شێروان مەزن، بەئۆتۆمبێلێكی فریاكەوتن ( ئەمبوڵانس) تووشی رووداوی هاتوچۆ دەبێت، دواتر لەكاتی گواستنەوەیدا بۆ نەخۆشخانە، ئەو ئۆتۆمبێلەی پێی گواستراوەتەوە، بەهەمان شێوە تووشی رووداوی هاتوچۆ دەبێت و وەردەگەڕێت، بەهۆیەوە گیانی لەدەستدا.

بەگوێرەی زانیارییەكان، بەیانی ئەمڕۆ هەیینی 21ی ئاداری 2025 د. قەحتان جیهاد سورچی، بەناونیشانی پزیشكی خولاو لەنەخۆشخانەی مێرگەسۆر لەكاتی راپەڕاندنی ئەركی فەرمی خۆیدا، بەئۆتۆمبێلێكی ئەمبوڵانس لەگەڵ چەند هاوكارێكیدا دەچن بەهانای نەخۆشێكی برینداری ناحیەی شێروان مەزن تا بیگوێزنەوە بۆ نەخۆشخانەی بلێ، بەڵام لەرێگاو لەنزیك گەلی ئەشكەفتێ تووشی رووداوی هاتوچۆ دەبن.

دوای گواستنەوەی بریندارانی ئەو رووداوە لەرێی ئۆتۆمبێلێكی تایبەت، ئۆتۆمبێلەەكە بەهەمان شێوە تووشی رووداوی هاتوچۆ دەبێت و وەردەگەڕێت، لەئاكامدا د. قەحتان گیانی لەدەستداو چەند كارمەندێكی تر كەلەگەڵیدا بوون بریندار دەبن.