راچڵەکین-

دەزگای ئاسایشی هەرێم رایگەیاند، بە تۆمەتی کوشتنی ژنێک تۆمەتبارێکییان دەستگیر کردووە و ئاماژەی بەوەش کردووە، تۆمەتبارەکە لە کۆیە خۆی حەشارداوە.

بە گوێرەی راگەیاندراوێکی دەزگای ئاسایشی هەرێم، برایەک بە تۆمەتی کوشتنی خوشکەکەی دەستگیرکراوە، تۆمەتبار لە هەولێر تاوانەکەی ئەنجامداوە و دوای رووداوەکە هەڵهاتووە.

لە راگەیاندراوەکەدا هاتووە، "رۆژی ٢٠٢٥/١/١١ لەشاری هەولێر بەهۆی کێشەی خێزانییەوە ژنێک بەناوی (ژ، ی، ت) لەلایەن براکەیەوە دەکوژرێت و پاش ئەنجامدانی تاوانەکە تۆمەتبار هەڵدێت".

بەڕێوبەرایەتییەکە ئاماژەی بەوەشکردووە، "دوای بڵاوبونەوەی هەواڵەکە لە دەزگاکانی راگەیاندن دەزگای ئاسایشی هەرێم، لەپێناو دەستگیرکردن و دۆزینەوەی تۆمەتبار دەستبەجێ بەدواداچوونی ورد لەلایەن بەڕێوەبەرایەتی ئاسایشی رۆژهەڵاتی هەولێر و بەڕێوەبەرایەتی ئاسایشی سلێمانی بەهاوکاری بەڕێوەبەرایەتی تەکنەلۆجیای زانیاری ئەنجام دەدات و دوای بەدەستهاتنی زانیارییەکان، دەردەکەوێت تۆمەتباری رووداوەکە لە شاری کۆیە خۆی حەشارداوە و بە بڕیاری دادوەری لێکۆڵینەوەی ئاسایش، توانرا لە ٢٠٢٥/١/١٥ تۆمەتباری بکوژ بەناوی (ت، ی، ت) دەستگیربکەن و ئەو چەکەش کە تاوانەکەی پێ ئەنجامدرابوو دەستیبەسەرداگیرا".

هـ . یـ