راچڵەکین-

پلاتفۆرمی بەناوبانگی واتسئەپ کە کۆمپانیای مێتا خاوەندارێتی دەکات، دیزاینێکی نوێ تاقیدەکاتەوە کە شوێن بۆ کۆمەڵێک بۆتی زیرەکی دەستکرد بۆ بەکارهێنەران تەرخان دەکات.

نوێکردنەوەکە لە نوێترین وەشانی تاقیکاری ئەندرۆیددا بەردەست دەبێت، هەروەها تابێکی نوێی AI زیاد دەبێت بۆ شاشەی سەرەکی ئەپەکە بە ناوی "AIs".

تابە نوێیەکە لیستی بۆتەکانی AI لەخۆدەگرێت کە گوزارشت لە کەسایەتییە بەناوبانگەکان دەکەن بۆ چاتکردن لەگەڵیان، ئەمە جگە لە بۆتی دیکە کە بەپێی بابەتەکان رێکخراون، هەروەها نوێکارییەکە دابینکردنی تایبەتمەندیەکانی AIی بەهێزکراوی تێدایە، وەک دروستکردنی وێنە و ستیکەر، هەروەها ئامرازێکی گەران کە لەسەر بنەمای Meta AI دامەزراوە.

هەرچەندە ئەم ئامرازانە زۆر تازە نین بۆ واتسئەپ، بەڵام تەنها لە هەندێک وڵات و بە چەند زمانێکی کەم بەردەستن، لە ئێستادا بەکارهێنەران لە رێگەی تابی سەرەکی چاتەکانەوە دەتوانن بچنە ناو بۆتە زیرەکەکان.

تایبەتمەندییەکی دیکە کە مێتا تاقیدەکاتەوە توانای دروستکردنی کارەکتەری AI ی تایبەتە بە شێوەیەکی راستەوخۆ لە رێگەی ئەپەکەوە، تایبەتمەندییەک کە پێشتر تەنها لە رێگەی بەشی AI Studio ی ئینستاگرامەوە بەردەست بوو.

تابی نوێی AI جێگەی تابی Communities دەگرێتەوە بەبێ ئەوەی لەناوی ببات، چونکە گواستراوەتەوە بۆ تابی Chats.

تا ئێستا پلاتفۆرمەکە وادەی فەرمی خستنەبازاری تابە نوێیەکەی ئاشکرا نەکردووە و پێدەچێت تەنها بۆ ئەو وڵاتانە بمێنێتەوە کە تایبەتمەندی زیرەکی دەستکردیان تێدا بەردەستە .

ئامانجی مێتا لە رێگەی ئەم هەنگاوەوە هاندانی بەکارهێنەرانە بۆ پەیوەندیکردن لەگەڵ رۆبۆتە زیرەکەکەی Meta AI و چاتبۆتەکانی تر کە لەسەر بنەمای ئەو رۆبۆتە زیرەکەکانە.

 

هـ . یـ