راچڵەکین-

دوای گەیشتنی سەرۆک وەزیرانی عێراق  و پێشوازیکردنی لەلایەن مەسعود پزیشکیان،سەرۆککۆماری ئێران لەبارەی دەرەنجامی کۆبوونەوەکانیان لە کۆنفرانسێکی رۆژنامەنوسیدا رایانگەیاند،عێراق و ئێران هەمانەنگی یەکتری دەکەن بۆ پاراستنی ئاسایش و سەقامگری ناوچەکە، بە پشتبەستن بە رێکەوتنی ئەمنی و ستراتیژی بازرگانی نێوان هەر دوو وڵاتەکە. 

ئاماژە بەوەش کراوە، هەردوو وڵاتەکە ریکارە ئەمنییەکان بۆ پاراستنی دەروازی سنورییەکان چڕتردەکەنەوە و کۆتایی دەهێنن بە بەقاچاخبردنی سامانی نیشتمانی عێراق بۆ ناو خاکی ئێران و بە پێچەوانەشەوە. 

دەقی وتەکانی سەرۆک وەزیرانی عێراق؛ 

محەمەد شیاع سودانی، سەرۆک وەزیرانی عێراق لە کۆنفرانسێکی رۆژنامەوانیدا رایگەیاند، سوپاسی سەرۆک کۆماری ئێران دەکەن بۆ رەخساندنی ئەم دەرفەتە و گفتوگۆکردن لەبارەی چەند پرسێکی گرنگ بەتایبتەیش رەخساندنی دەرفەتە نوێکانی هەماهەنگی ئابووری و ستراتیژی پاراستنی دەروازە سنورییەکان. 

ئاماژەی بەوەش کرد،عێراق و ئێران دراوسێیەکی گرنگی یەکدین و هەمیشە هەماهەنگی یەکتری دەکەن لە گۆڕانکلارییەکانی ناوچەکە، هەر بۆیە لە ئەمڕۆشدا داوای چارەسەرێکی گشتی و سیاسی کراوە کە بتواندرێت لە رێگایەوە سنورێک بۆ دەستوەردانی دەرەکی دابندرێت و کۆتایی بە پێشێلکاری سەروەری خاکی عێراق بهێندرێت، ئەمەش دەبێتە قۆناغێکی نوێ بۆ پاراستنی ئاسایش و سەقامگیری ناوچەکە و بەتایبەتیش سوریا، چونکە وەک عێراق و گەلی عێراق رێز لە خواستەکانی گەلی سوریا دەگرن و هەماهەنگیان دەبن بۆ پاراستنی سنورەکانیان. 

سودانی لە وتارەکەیدا جەختی لەوەش کردەوە، رێکەوتنی ئابووری نێوان عێراق و ئێران بەتایبەتیش هێڵی گەشەپێدان دەبێتە هۆی کرانەوەی عێراق بەرووی ئابووری جیهان و دەروازە نوێکانی ئابووری نانەوتی بەهۆی ئەوەی عێراق خاکێکی ستراتیژی هەیە ئەوەش وادەکات خواستی جیهان بۆ دەستراگەیشتن بە وڵاتانی رۆژهەڵاتی ناوەڕاستو  وڵاتانی ئەوروپا لە خاکی عێراقەوەبێت. 

سەرۆک وەزیرانی عێراق لە کۆتایی قسەکانیدا جەختی لەوە کردەوە، کە عێراق هەمیشە هەوڵیداوە کە بە زمانێکی دیپلۆماسیانە کۆتایی بە ئاڵۆزییەکانی ناوچەکە بهێنێت بەردەوانیش لە رێگای پەیوەندییە دیبلۆماسییەکانیەوە هەوڵی راگرتنی ئاڵۆزییەکان وپاراستنی خاکی عێراقیان داوە و رێگەشیان نەداوە کە سەروەری خاکی عێراق پێشێلبکرێت بۆ لێدان لە وڵاتی ئێران کە دراوسێ و دۆستێکی عێراقە.وتیشی، " لە ئایندەیەکی نزیکدا کۆبوونەوەیەکی تایبەت بە ئاشتی رۆژهەڵاتی ناوەڕاست رێکدەخەن". 

دەقی وتەکانی مەسعود پزیشکیان؛ 

لەمیانی کۆنگرەکەدا مەسعود پزیشکیان، سەرۆک کۆماری ئێران رایگەیاند، وەک ئێران پابەندن بە پاراستنی سەروەری خاکی عێرق و ناسیانەوێت هیچ هەنگاوێک بنێن کە ببێتە هۆی دروستبوونی مەترسی بۆ سەر سەروەری ئاسمان و خاکی عێراق لە ناوچەکەدا، هەر بۆیە رێککەوتنی ستراتیژی پاراستنی دەروازە سنورییەکانیان قوڵترکردووەتەوە کە دەبێتە هۆی کۆتایی هێنان بە جوڵەی نایاسایی و بەهەدەردان و بردنەدەرەوەی سامانی نەتەوەی دەکات. 

ئاماژەی بەوەش کرد،لە ئێستادا ئێران و عێراق بەتەواوی لە رێککەوتنێکی گشتگیر و نوێدان کە سەقامگیری خاکی هەردوو وڵاتەکە دەپارێزێت و ئەوەش وادەکات کۆتای بە ئاڵۆزییەکانی ناوچەکەبهینێت، لە بەرامبەریشدا هەردوو لا پابەندییەکانی خۆیان دەپارێزنو  رێز لە سەروەری خاکی یەکتری دەگرن بەبێ ئەوەی هیچ ئاساکارییەک بۆ هەر پێشێلکارییەک بکەن. 

باسی ئەوەش کردەوە، ئێران و عێراق وەک دوو دراوسێ سەرکەوتووبون لە پاراستنی ناوچەکە و رێگەشیان لە فراوانبوونی ئاڵۆزییەکان گرتووە بەتایبەت ئاڵۆزییە ناوخۆییەکانی سوریا کە نەبووەتە هۆی دروستبوونی مەترسی گەورەتر بۆسەر ناوچەکە. 

لەکۆتایی کۆنگرەکەشدا هەریەک لە سەرۆک وەزیرانی عێراق و سەرۆک کۆماری ئێران جەختیان لە هەماهەنگی و پابەندبوونی هەردوو وڵاتەکە کردەوە و لەبارەی پرسی ئابووری و ستراتیژی ئەمنی ناوچەکەدا رایانگەیاند،" لە رێکەوتنەکانمان سەرکەتووبوین".