وێنە.. ئەرشیف

راچڵەكین -

هێرش و بۆردومانەكانی سوپای ئیسرائیل بۆسەر كەرتی غەززە بەردوامەو لەماوەی 24 كاتژمێری رابردوودا، زیاتر لە 80 كەسی دیكە بوونە قوربانی، کە 10 کوژراو ئەندامی یەک خێزانن، تەندروستی غەززەش ئاشكرایدەكات، كۆی ژمارەی كوژراوو برینداران لەسەرەتای هێرشەكانەوە تائێستا 152 هەزاركەسی تێپەڕاندووە.

ئەمڕۆ شەممە، وەزارەتی تەندروستی لە كەرتی غەززە، لە راگەیەندراوێكدا بڵاویكردەوە، لەماوەی 24 كاتژمێری رابردوودا لەئەنجامی هێرش و بۆردومانەكانی سوپای ئیسرائیل بۆسەر ناوچەكانی كەرتی غەززە، 21 هاووڵاتی دیكەی مەدەنی كوژران، كە 10 كەسیان ئەندامی یەك خێزانن، هاوكات 62 كەسیش بریندار بوون.

وەزارەتەكە ئاشكرایكردووە، لە دەستپێكی هێرشەكانی ئیسرائیل بۆسەر كەرتی غەززە لە مانگی ئۆكتۆبەری 2023 تاوەكو ئێستا، 45 هەزارو 227 كەس كوژراون، ژمارەی بریندارانیش بۆ 107 هەزارو 573 كەس بەرزبووەتەوە، كە زۆربەیان ژن ومنداڵن.

تەندروستی غەززە ئاماژەی بەوەشكردووە، تائێستا چارەنووسی هەزاران كەس لە دانیشتووانی كەرتی غەززە نادیارەو پێدەچێت تەرمەكانیان لەژێر داروپەروودی باڵەخانە خاپووركراوەكاندا مابێتەوە. 

بەردەامبوونی هێرش و بۆردومانەكای سوپای ئیسرائیل هاوكاتە لەگەڵ هەوڵێكی چڕی كۆمەڵگەی نێودەوڵەتی بۆ راگرتنی شەڕ لە غەززەو ئاڵوگۆڕی دیل و بارمەتەكان لەنێوان ئیسرائیل و بزوتنەوەی حەماس.