راچڵەکین-
زانایان لە توێژینەوەیەکی نوێدا ٢٦ وێنەی تیشکی وردیان لەبارەی ئەو گۆڕانکارییانەوە خستووەتە روو کە تیایدا ئەوە روون دەکەنەوە، پێکهاتەی مێشکی دایکان لەدوای پڕۆسەی دووگیانبوون بە چ شێوەیەک دەگۆڕێت.
ئەو زانایانە وێنە تیشکییەکەیان بۆ مێشکی خانمێکی تەمەن ٣٨ ساڵ گرتووە، بۆیان دەرکەوتووە لەدوای پڕۆسەی دووگیانبوون پێکهاتەی مێشکی ئەو دایکە گۆڕانکاری بەسەردا هاتووە و ئەوەش کاریگەریی لەسەر رەفتارەکانی جێهێشتووە.
زانایان رایانگەیاندووە، ئەوان بەردەوامن لەسەر لێکۆڵینەوە و درێژەدانی زیاتر بەو توێژینەوەیە و دەیانەوێت گروپێکی گەورەتر وەک نموونە وەربگرن.
ئەو زانایانە لە توێژینەوەکەدا گەیشتوونەتە ئەو دەرئەنجامەی، ئەو بەشەی مێشکی دایکەکە گۆڕانکاری بەسەردا هاتووە، کە دەتوانێت هاوکار بێت لە رێکخستنی پەیوەندییە کۆمەڵایەتی و سۆزدارییەکان، ئەو گۆڕانکارییەش بۆماوەی دووساڵ ماوەتەوە و بەردەوام بووە.
پزیشکانی پسپۆڕ و توێژەران باس لەوەدەکەن، گەیشتن بەو دەرئەنجامە وایانلێدەکات کە زیاتر بزانن لەبارەی گۆڕانکارییە رەفتاریی و دەروونییەکانی دایکان لەدوای منداڵبوون.
دەشڵێن، ئەوە یارمەتیدەرێکی باشە بۆ تێگەیشتن لە نیشانە سەرەتاییەکانی خەمۆکی دوای منداڵبوون و ژەهراویبوونی دووگیانیی، کە ئەوەشیان حاڵەتێکە دایکەکە تووشی چەند گرفتێکی وەک بەرزی پەستانی خوێن و گرژبوون و سەرئێشەی بەردەوام، هەڵئاوسانی نائاسایی لە دەست و دەموچاو و زیادبوونی کێش بەشێوەیەکی کتوپڕ و چەندین نیشانەی دیکە.
هـ.ئـ