راچلەکین-
بڵاوبوونەوەی نەخۆشییەکی مێشک لەناو گەنجانی کەنەدادا تەندروستی وڵاتەکەی بەخۆیەوە سەرقاڵکردووە و دەستیان بە لێکۆڵینەوەی چڕ لەو بابەتە کردووە.
میدیاکانی ئەمریکا بڵاویانکردەوە، بڵاوبوونەوەی نەخۆشییەکی مێشک لە بەشی نیو برۆنزویکی باشووری رۆژهەڵاتی کەنەدا، تەندروستی وڵاتەکەی هێناوەتە سەر خەت و داوای ئەوەدەکەن، زاناکانی بواری پزیشکی دەستبەجێ دەست بە لێکۆڵینەوە بکەن.
لەوبارەیەوە سوزان هۆڵتی سەرۆکوەزیرانی نیو برۆنزویک داوای لە ئاژانسی تەندروستی گشتی وڵاتەکەی کردووە، هاوکارییان بکەن لە لێکۆڵینەوە لە بڵاوبوونەوەی ئەو نەخۆشییەدا، کە بە سەدان کەس تووشی بوون و بە گشتیش تەمەنیان لەخوار ٤٥ ساڵەوەیە.
دەشڵێت، "ئێمە نازانین چۆن شیکاری نەخۆشییەکە بکەین و مامەڵەی لەگەڵدا بکەین، چونکە هیچ شتێک لەبارەی هۆکارەکەیەوە نازانین".
لەوبارەیەشەوە ئالیەر ماریریۆ پزیشکی پسپۆڕی مێشک باسی لەوەکردووە، لەم چەند ساڵەی کۆتاییدا بە سەدان نەخۆشی پشکنیوە کە بەدەست نیشانەکانی تێکچوونی دەمارییەوە ناڵاندوویانە.
مێژووی دەستنیشانکردنەکەی:
نەخۆشییەکە بەشێوەیەکی گشتی لە ساڵی ٢٠١٥ـەوە دەستنیشان کراوە و بڵاوبوونەوەکەی بەشێوەیەکی خاو بووە، لە سەرەتادا ٢٠٠ کەسی توشی بوون و تاوەکو ساڵی ٢٠٢٢یشدا ١٤٧ حاڵەتی دیکەی ئەو نەخۆشییە دەستنیشان کراون، کە تەمەنیان لەنێوان ١٧ بۆ ٨٠ ساڵدا بووە.
لە ساڵی ٢٠٢١دا ٩ حاڵەتی گیانلەدەستدان بەهۆی ئەو نەخۆشییەوە تۆمارکراون و لە ئێستاشدا زیاتر لە ٤٠٠ کەس لە کەرتی نیو برۆنزویکدا تووشی نەخۆشییەکە بوون.
تاکە بەڵگەی بەردەست:
نەخۆشییەکە هۆکارێکی دیاریکراوی بۆ نەدۆزراوەتەوە لەلایەن پزیشکانەوە و باس لەوەدەکەن، هەموو ئەوەی هەیە ئەوەیە، لە پشکنینی خوێنەکانیاندا ماددەی قڕکەر دۆزراوەتەوە و گوماندەکەن بەکارهێنانی قڕکەرەکان لە چەند ناوچەیەکدا کاریگەریی لەسەر دەرکەوتنی نیشانەکان هەبووبێت.
نیشانەکانی نەخۆشییەکە:
لە نیشانە دیارەکانی نەخۆشییەکە کە پزیشکان ئاماژەیان پێداوە ئەوەیە، نەخۆشەکان بەشێوەیەکی گشتی بەدەست قەلەقییەکی زۆر و گرفتی خەوەوە دەناڵێنن، هەروەها ئازاری زۆری بەشێکی جەستە بەبێ هۆکار و لەدەست دانی هاوسەنگی جەستە، رزین و هەڵوەرینی ددانەکان، گرژبوونی توندی ماسولکەکان، گرفتی بینین و هەڵوەسەکردن.
هـ.ئـ