راچڵەكین -

هێرش و بۆردومانەكانی سوپای ئیسرائیل بۆسەر كەرتی غەززە بەردوامەو لەماوەی 24 كاتژمێری رابردوودا لەئەنجامی سێ هێرشی دیكە، 140 كەسی دیكە بوونەتە قوربانی، تەندروستی غەززەش ئاشكرایدەكات، كۆی ژمارەی كوژراوو برینداران 136 هەزارو 200 كەسی تێپەڕاند.

ئەمڕۆ پێنجشەممە، وەزارەتی تەندروستی لە كەرتی غەززە، لە راگەیەندراوێكدا بڵاویكردەوە، لەماوەی 24 كاتژمێری رابردوودا لەئەنجامی هێرش و بۆردومانەكانی سوپای ئیسرائیل بۆسەر ناوچەكانی كەرتی غەززە، 34 هاووڵاتی دیكەی مەدەنی كوژران و 96 كەسیش بریندار بوون.

وەزارەتەكە ئاشكرایكردووە، لە دەستپێكی هێرشەكانی ئیسرائیل بۆسەر كەرتی غەززە كە 342 رۆژە بەردەوامە، تاوەكو ئێستا، 41 هەزارو 118 كەس كوژراون، ژمارەی بریندارانیش بۆ 95 هەزارو 125 كەس بەرزبووەتەوە، كە زۆربەیان ژن و منداڵن.

لەدوای تێپەڕبوونی 342 رۆژ بەسەر شەڕی ئیسرائیل و حەماس، كە بەهۆیەوە زۆربەی ناوچەكانی كەرتی غەززە خاپوور بوون و زیاتر لە ملیۆنێك و 800 هەزار دانیشتووی ناوچەكەش ئاوارە بوون، تائێستا هەوڵەكان بەئامانجی راگرتنی شەڕو گەیشتن بە رێككەوتن، ئەنجامی نەبووەو هەردوو لایەنی شەڕكەر پێداگریی لەسەر مەرج و داواكارییەكانیان دەكەن بۆ رێككەوتنی ئاشتی.