راچڵەکین-

دانوستانکاری هاوپەیمانی" کەرکوک هێز و ئیرادەمانە رایگەیاند، کاتی ئەوە هاتووە لە یەکتر تۆمەتبارکردن بە ناپاکی دووربکەونەوە.

خالید شوانی دانوستانکاری "هاوپەیمانی کەرکوک و هێز و ئیرادەمانە" رایگەیاند: لەژێر ناوی داکۆکیکردن لە کەرکوک، هەڵمەتێکی ناڕەوا و نامرۆڤانە دژی ئەو ئەندامەنی ئەنجومەنی پارێزگای کەرکوک لە پێکهاتەی عەرەب دەستیپێکردووە، کە بەشداری کۆبوونەوەی هەڵبژاردنی پارێزگاری کەرکوکیان کردووە.

ئاماژەی بەوەشکرد: ئەو هەڵمەتانە بەدەرە لە هەموو پێوەرە مرۆڤایەتی و ئەخلاقییەکان، چونکە ئەوانەی بەشداری کۆبوونەوەکەیان کردووە تەنها هەوڵیان بۆ پۆستەکان نەداوە، بەڵکو زۆر بە توندی داکۆکیان لەسەر مافەکانی پێکهاتەی عەرەبی دەکرد.

باسی لەوەشکرد: کاتی ئەوە هاتووە هەمووان لە بەکارهێنانی زمانی توند و یەکتر تۆمەتبارکردن بە ناپاکی دووربکەونەوە، چونکە ئەوەی بۆ دانیشتووانی کەرکوک گرنگە دەسەڵاتێکە کە خزمەتیان بکات و سەقامگیری و پێکەوەژیان لە پارێزگاکەدا بپارێزێت.