راچڵەکین-

چوار كاندیدی هەڵبژاردنی شەشەمین خولی پەرلەمانی کوردستان، بەبڕیاری کۆمیسیۆنی هەڵبژاردنەکانی عێراق دوورخرانەوە.

كۆمسیۆنی باڵای سەربەخۆی هەڵبژاردنەكانی عێراق رایگەیاند، بە هۆی سەرپێچی و پابەند نەبوون بە ڕێكارەكانی كۆمیسیۆن ژمارەیەك كاندیدی لە هەڵبژاردنی پەرلەمانی كوردستان دوور خستۆتەوە.

بەپێی راگەیەندراوەکەی کۆمیسیۆن، هەریەك لە هیلین ئەكرەم، هیمن عومەر و سامان مەحمود، دیاری هیدایەت، بڕیاردرا بە دوور خستنەوەیان لە هەڵبژاردنی پەرلەمانی كوردستان.

عیماد جەمیل سەرۆکی تیمی راگەیاندنی کۆمسیۆن بە میدیای فەرمی یەکێتی راگەیاند: "جگە لە کاندیدە سەربەخۆکە، ئەو سێ کاندیدەی دیکە کە دوورخراونەتەوە لە لیستەکانی نەوەی نوێ-ن و داوایان لێکراوە ناوی دیکە لەجێی کاندیدە دوورخراوەکان پێشکەشی کۆمسیۆن بکەن".

بڕیارە 20ی مانگی 10ی ئەمساڵ شەشەمین خولی هەڵبژاردنی پەرلەمانی کوردستان بەڕێوەبچێت، کە کۆمیسیۆنی باڵای سەربەخۆی هەڵبژاردنەکانی عێراق سەرپەرشتی دەکات.