راچڵەکین-
داواکاری گشتی ڕووسیا، فەرمانی بە بڵاوکەرەوەیەکی بیانی کردووە کە ڕۆمانێکی پڕفرۆش لە بازاڕی کتێبەکان بکێشێتەوە، ئەمەش بەهۆی "هەڕەشەی ئەمنی".
ڕۆمانەکەش ناوی "مشک"ە، لە نووسینی ئیڤان فیلیپۆڤ ساڵی ٢٠٢٣ بڵاوکرایەوە و ستایشی زۆری کرا.
لەم ڕۆمانە خەیاڵییەدا، مشکێک لە تاقیگەیەک هەڵدێت، کە تێیدا ڤاکسینێک بۆ درێژکردنەوەی تەمەنی ڤلادیمێر پوتین دروست دەکرێت، و دۆخێکی "ئاخرزەمانی" لە مۆسکۆدا دروست دەکات.
نووسەری ڕۆمانی "مشک" دەڵێت بابەتی ئەم ڕۆمانە "لێکۆڵینەوە لە ڤایرۆسی شەڕە".
لایەنگرانی کرێملین ڕۆمانەکەیان بە "پڕ لە ڕوسۆفۆبیا" ناوبردووە و بێزاری خۆیان دەربڕیوە لەوەی لە کتێبفرۆشییەکانی ڕووسیادا دەفرۆشرێت.
تا ئەم دواییانە، چاپکردنی کتێب لە ڕووسیا لە ئەستۆی چاپکەردا بووە و پێویستی بە مۆڵەت نەبووە. هێشتا بە ڕواڵەت ئەم ڕەوتە نەگۆڕاوە، بەڵام لەگەڵ توندبوونەوەی ژینگەی ئەمنی لە دوو سێ ساڵی ڕابردوودا لە ڕووسیا، بڵاوکەرەوەکان بە شێوەیەکی سەرەکی ڕوویان لە خۆسانسۆری کردووە.