وه‌رگه‌ڕانی پێ
\ڕاچڵه‌كین-
وه‌رگه‌ڕانی پێ بریتییە لە سوڕانی جومگەی گۆزینگ بۆ دیوی ژورەوە کە دەبێتە هۆی پچڕانی بەستەرەکانی چواردەوری گۆزینگ، له‌م بابه‌ته‌دا دكتۆر دێدەوان نامق پسپۆڕی نەشتەرگەری ئێسک و شکان جۆر و نیشانه و چۆنیه‌تی چاره‌سه‌ری ئه‌م حاڵه‌ته ڕوون ده‌كاته‌وه.
وەک بەشێک لە پێکانی وەرزشی، بە یەکێک لە باوترین هۆکارە سەرەکیەکانی دوورکەوتنەوەی یاریزان دادەنرێت لە یاریە وەرزشیەکان (بە تایبەتی یاریزانانی بالە و باسکە) ،لە کەسانی ئاسایی تریش ڕوودەدات بە هۆی سوڕانی جومگە.
جۆرەکانی:
بە شێوەیەکی گشتی سێ جۆری هەیە:
1- برینداربوون و ڕووشانی بەستەری جومگە: ئەم جۆرەیان ئەستوربون ئازارێکی کەمی لەگەڵ دەبێت.
2- پچرانی ناتەواوی بەستەر: ئەمەیان ئەستوور بوون و ئازارێکی زیاتری ڵەگەڵ دەبێت.
3-پچرانی تەواوی بەستەری جومگە: ئەمەیان ئەستوور بوونێکی زۆر و ژانێکی زۆری لەگەڵ دەبێت، زۆربەی جار نەخۆش ناتوانێ لە سەری بڕوا و قورسایی خۆی بە تەواوی لە سەر دابنێ بەهۆی ئازار.
نیشانەکانی:
نیشانە سەرەکییەکانی بریتییە لە ئازاری جومگە بە تایبەتی کاتێک لە سەری دەڕوات و قورسایی خۆی دەکەوێتە سەر،
هەروەها ئەستوور بوون و خوێن تێزانێکی زۆری ژێر پێست.
دەست نیشان کردن:
زۆربەی جار نەخۆش سەردانی فریاکەوتنەکان دەکەن لە سەرەتادا، لە لایەن پزیشک پشکنینی نورینگەیی بۆ ئەنجام دەدرێت، هەندێکجار تیشکی ئیکس (x-ray) بۆ ئەنجام دەدرێت بۆ ئەوەی بزانرێت کە شکانی لە ئێسکەکانی جومگەی گۆزینگ نییە.
-چارەسەر بە بێ نەشتەرگەری:
چارەسەری دوو هەفتەی یەکەم:
-پێویستە جومگەی گۆزینگ و پێی بە باندەیج ببەسترێتەوە و بووزاو دابنرێت لەسەری تاوەکو ئەستوور بوونەکەی کەم بێتەوە، هەروەها پێویستی بە حەبی دژە ئازار و بەرزکردنەوەی پێیەکانی هەیە.
- ئەگەر ئەستوور بوون و ئازارێکی زۆری هەبێت لە کاتی دانانی قورسایی لەش لە سەری، ئەوکاتە پێویستە لە قالبی گەچ دابنرێت بۆ هەفتەک تا دوو هەفتە.
چارەسەری لە دوو هەفتە تا شەش هەفتە:
نەخۆش پێویستی بە ڕاهێنان و چارەسەری سروشتی دەبێت بۆ بەهێز کردن و ڕاکێشانی ماسولكەی ئەکیلس وماسولکەی دیوی دەرەوەی جومگەی گۆزینگ.
چارەسەر بە نەشتەرگەری:
ئەگەر نەخۆش بە شێوەکی دووبارەو بەردەوام تووشی ئازار و لەگەرچوون یان لە دەستدانی هاوسەنگی جومگەی گۆزینگ ببێت، ئەوا نەخۆش پێویستی بە چاندنی بەستەر یان جێگیر کردنی جومگە دەبێت بە بەکارھێنانی ماسوولکە ژێی دیوی دەرەوەی حومگە.