راچڵەكین- 

پێشبینی دەكرێت مۆبایلی “ئایفۆن 15” كە پێدەچێت لە مانگی ئەیلولی داهاتوودا نمایش بكرێت، گرانترین مۆبایل بێت كە تا ئێستا لەلایەن كۆمپانیای “ئەپڵ”ەوە بەرهەم هێنراوە، چونكە ڕەنگە نرخەكەی دوو هەزار دۆلار تێبپەڕێنێت. 


كەسانی ئاگادار لە پیشەسازیی ئامێرە ئەلیكترۆنییەكان، پێشبینیان كرد، نرخی ئایفۆن 15 ماكس 2 تی بی بگاتە 2099 دۆلار، كە زۆر زیاترە لە دەستپێكی نرخی لاپتۆپی MacBook Proی قەبارە 13 ئینج كە 1299 دۆلار بوو.  

بۆ بەراوردكردن، نرخی ئایفۆن 14 پرۆ ماكس 1 تی بی لە ساڵی ڕابردوودا لە 1599 دۆلارەوە دەستی پێكرد. 

ئایفۆنە نوێیەكە یەكەم ئایفۆن دەبێت كە میمۆرییەكەی 2 تێرابایتە، دەنگۆی ئەوەش هەیە كە تیتانیۆم و كامێرایەكی نوێكراو و چیپێكی نوێی بەهێزی هەبێت. 

 بڕیارە ئەپڵ لە 12ی ئەیلولی داهاتوو ئایفۆن 15 نمایش بكات، بەڵام پێدەچێت  The Pro Max ، تا مانگی تشرینی یەكەمە داهاتوو نەخریتە بازاڕەوە، بەوهۆیەی زنجیرەیەك كێشەی لە هەناردەكردن و دابینكردندا هەیە.