راچڵەكین-
دەرباز كۆسرەت رەسول- كارگێڕی مەكتەبی سیاسی یەكێتی نیشتمانی كوردستان رایگەیاند، نووسەران و رۆشنبیرانی هەولێر لەرابردوودا ڕۆڵێكی گەورەو دیاریان هەبووەو، هەمیشە یەكێتی پشتیوان و پاڵپشتیان بووەو زەمینەی لەباری بۆ ڕەخساندوون.
ئەمڕۆ دووشەممە لەبارەگای مەكتەبی سیاسی لەشاری هەولێر، دەرباز كۆسرەت رەسول- كارگێڕی مەكتەبی سیاسی یەكێتی نیشتمانی كوردستان بە ئامادەبوونی دكتۆر میران محەمەد ئەندامی مەكتەبی سیاسی و حاجی مەسیفی و فەهمی بوڕهان ئەندامانی سەركردایەتی ئامادەی بوون مەراسیمێكی ڕێزلێنانی بۆ ژمارەیەك نووسەرو ڕۆشنبیری هەولێر ڕێكخست.
دەرباز كۆسرەت ڕەسول، لەووتەیەكدا باسی لە گرنگی ڕۆڵی نووسەران و ڕۆشنبیرانی هەولێر كردو دووپاتی كردەوە:" لەڕابردوودا ڕۆڵێكی گەورەو دیاریان هەبووە و هەمیشەش یەكێتی پشتیوان و پاڵپشتی نووسەران بووەو زەمینەی لەباری بۆ ڕەخساندوون."
وتیشی:" ئەو مەراسیمی ڕێزلێنانە خزمەتێكی بچووكی یەكێتیە بۆ نووسەران و ڕۆشنبیران و لە داهاتووش بەردەوام دەبن."
لە بەشێكی تری مەراسیمەكەدا، دكتۆر میران محەمەد- لێپرسراوی مەكتەبی ڕێكخراوە دیموكراتییەكان، وتەیەكی پێشكەشی ئامادەبووان كردو تەواوی پشتیوانی و پاڵپشتی یەكێتی نیشتمانی كوردستانی بۆ نووسەران و ڕۆشنبیران دووپات كردەوە.
لەكۆتایی مەراسیمەكەدا بڕوانامەی ڕێزلێنان لە ئەزموون و ڕابردووی ڕۆشنبیران و نووسەران پێشكەشی ئامادەبووان كرا.
