كەنداوی عوممان؛ 44 ئەندامی تیمی ئەو دوو كەشتییە نەوتییەی هێرشیانكرایە سەر.. ڕزگار كران

161 جار خوێندراوەتەوە کات12:03 بەروار13-06-2019
كەنداوی عوممان؛ 44 ئەندامی تیمی ئەو دوو كەشتییە نەوتییەی هێرشیانكرایە سەر.. ڕزگار كران

راچڵەكین-

سەرچاوەیەكی ئاگادار رایگەیاند، 44 ئەندامی تیمی ئەو دوو كەشتییە نەوتیەی ئەمڕۆ لەكەنداوی عوممان هێرشیان كرایەسەر، ڕزگار كران.

ئەمڕۆ پێنجشەممە 13ی حوزەیرانی 2019 دوو كەشتی زەبەلاحی نەوتهەڵگر لە كەنداوی عوممان هێرشیان كرایە سەرو تێكشكان، یەكێك لەكەشتییەكانیش گڕیگرت و مەترسی لەسەر گیانی سەرنشینانی ناوی دروستكرد.

سەرچاوەیەكی ئاگادار بە ئاژانسی ئیرنا-ی ئێرانی راگەیاندووە، بەهەماهەنگی لەگەڵ ناوەندی لێكۆڵینەوەو بەدەنگەوە هاتن لە " هورمز خان" 44 سەرنشینی ناو هەردوو كەشتییەكە ڕزگاركراو ن و گواستراونەتەوە بۆ بەندەری " جاسك"ی ئێرانی.

ئەو سەرچاوەیە وتیشی، یەكێك لەكەشتییەكان ئاڵای دوورگەكانی مارشاڵ-ی پێوەبووەو ماددەی " ئیسانۆڵ" ی هەڵگرتووە و لەبەنداوی قەتەڕ-ەوە بەرەو تایوان رۆیشتووە.

كەشتییەكەی تریش ئالای پەناما-ی پێوەبووەو بەنیاز بووە لەیەكێك لەبەنداوەكانی سعودیەوە بەرەو سەنگاپور بڕوات.