كلیپێكی بڵاونەكراوەی هونەرمەندی جوانەمەرگ ئەردەڵان بەكر بڵاودەكرێتەوە

1888 جار خوێندراوەتەوە کات03:34 بەروار10-06-2019
كلیپێكی بڵاونەكراوەی هونەرمەندی جوانەمەرگ ئەردەڵان بەكر بڵاودەكرێتەوە


راچڵەكین-
هەردی عومەر كامێرامان و دەرهێنەر بۆ یەكەمجار كلیپێكی بلاونەكراوەی هونەرمەندی جوانەمەرگ ئەردەڵان بەكر بڵاودەكاتەوە كە 18 ساڵ لەمەوبەر كارەكانی بۆ كراوە.


هەردی عومەر لەبارەی كلیپە بڵاونەكراوەكەی ئەردەڵان بەكر دەڵێت: "کلیپێکی جوانە مەرگ ئەردەڵان بەکر پێش هەژدە ساڵ دروست کراوە ئێستا بڵاوی دەکەینەوە".

هەردی عومەر ئاماژەی بەوەشداوە: "ئەردەڵان کەسێکی بە جورئەت بوو حە زی لە تازەگەری بوو هەموو کات دڵسۆزی هاوڕێکانی بوو کوردی خۆش دەویست".

لەبارەی ئەم كلیپە هەردی عومەر روونیكردووەتەوە كە، "نوسخەی یەکەمی کلیپەکە کاتی خۆی وون بوو ئەمە نوسخەی دووهەمی خامەکەیەتی بە VHS هەڵگیراوە بۆیە کوالیتی وەک پێویست نیە بەڵام بۆمێژووی هونەری ئەم هونەرمەندە بە پێویستمان زانی بڵاویبکەینەوە".


ھونەرمەند ئەردەڵان بەکر لە 25-09-1967 لە هەولێر لە گەرەکی خانەقا لە دایکبووە تا پۆلی 3 ناوەندی خۆیندووە، لە منداڵیدا لە قوناغی سەرەتایی زۆر زیرەک بوو، هەموو ساڵێک بە یەکەم دەرچووە، ئەو وزەیەکی باشی هە بوو، وەرزشکارێکی باش بووە. 
 
ئەردەلان لەخێزانێکی کورد پەروەرو گەورە بووە، هەر لە تەمەنی هەرزەکاری حەزو خولیای هونەری هەبووە هەر زوو لە تەمەنیکی زۆر بچووک هەوڵدەدات پەیوەندی بەڕیزەکانی پیشمەرگەی کوردستانەوە بکات بەڵام لەبەر بچوکی تەمەنی وەرناگیرێت. 
 
خەباتی 
دوای تەمەنی 18 ساڵی ئەردەڵان دەبێتە پێشمەرگەی یەکێتی نیشتمانی کوردستان لەتیپی 86 ی بەرانەیەتی.
 
لە دوای شاڵاوی بەدناوی ئەنفالییش لە ساڵی 1988 لەناو رێکخستنەکانی یەکێتی، دەست بەخەباتی نهێنی دەکات، لەناوی شاری هەولێر، لە راپەرینیشدا سەرپەرشتی هێزیک دەکات بۆ چەند گەرەکێک لەوانە، گەرەکی خانەقا تاکو دەگاتە، شارع هەولێر.
 
لە کۆڕەوی 1991 کوردستان بە جێ دەهێڵێت و دەچێتە وڵاتی سوید، ماوەی 15 ساڵ لە غوربەت ژیا، لێرەدا یەکێک لەوتەکانی دەھێنینەوە یادی خوێنەر کە بەردەوام لەگەڵ لەگەڵ هاوەڵەکانی دەیووت (مرۆڤ هەستە من قەت هەست ناکەم کە لەهەندەرانم هەمیشە وا دەزانم لە کوردستانم) هێندە خۆشەویشتی بۆ خاک و نیشتمانی هەبوو. 
 
چالاکیی هونەری 
 
ئەردەڵان نمونەی هونەرو هونەر مەندانی کورد بوو، لەساڵی 1986 یەکەم کاسیتی خۆی بلاوکردۆتەوە..لە ساڵی 1993یش لە وڵاتی سوید یەکەم ئەلبوومی بڵاوکردەوە. 
ئەردەڵان خاوەنی 5 ئەلبومی گۆرانییە...لەوانە، 
شەم - şem 
ئەلبومی 2007 - Elbumî 2007 
وەفای عەشق - Wefay 'Eşq 
هەڵبژاردە – Hellbjarde 
ئەردەڵان بەکر – لە یەکێک لە گۆرانیەکیانیدا بەناوی (کچی گاور) دەڵێت: 
کچی گاور دڵی بردم ئەشقی بووم پیری کردم 
تازە دونیایی من وایە من بریندارم ئەو تەبیبم 
وا دەرۆی و جێم دەهێلی 
برینی کۆنە بە ئێش دێنی 
دەرۆی پێم بڵی بۆ چ لایەک 
هیچ کەس وەک من خۆشتی ناوێ 
ئیشقی جوانیت وای لێکردم دونیاو خەیاڵی بردم 
لە تەمەنی نێو گەنجیما رسوای هەردوو دونیات کردم 
جوانەمەرگ نە خۆشی درێژخایەنی هەبوو، خۆی دەیزانی، چونکە پزیشکەکان پێیان گوتبوو، بەڵام ئەو زۆر بەئومێدێکی گەورەوە لەدڵ و خەیاڵی دانابوو چاک ببێتەوە، یاخود بەرەو باشی بڕوات و ئیتر دەست بکات بە وەرزش و ژیانێکی نوێ بۆ خۆی دابین بکات !؟ بەڵم لە هەمان کاتدا نەیدەویست ئازیزانی خۆی دڵ گران بکات بەم هەواڵە ناخۆشەی.. بڕیاری دابوو کە لای کەس باسی نەکات تەنها لەلای براکانی و چەند کەسێکی تر. 
 
مخابن، مەرگ رێگەی نەدا ئەردەڵان کاری باشترو جوانتر پێشکەش بکات‌و، لەرۆژی 2009-10-10، لە یەکێک لە نەخۆشخانەکانی وڵاتی سوید، بەنەخۆشی کۆچی دوایی کرد‌و. دوای چوار رۆژیش لە ئێوارەی 2009-10-14، تەرمەکەی لەسەر ئەرکی کۆسرەت رەسوڵ جێگری سکرتێری گشتی یەکێتێ گەڕێندرایەەە هەولێرو رۆژی 2009-10-15، لە مەراسیمێکی شایستەدا لە گۆڕستانی شێخ ئەحمەد لە هەولێر بەخاک سپێردرا. 
 
ڕۆژی 06-03-2014 بەئامادەبوونی قوباد تاڵەبانی و نیاز نوری نەقیبی سەندیکای هونەرمەندان و ژمارەیەکی بەرچاو لە کەسایەتی و رۆشنبیران و بنەماڵەی هونەرمەندی کۆچکردوو ئەردەڵان بەکر، لە پارکی منارە لە هەولێر پەردە لەسەر پەیکەری ئەو هونەرمەندە لادرا. 
پەیکەرەکە لەلایەن پەیکەرساز رێبین سەرکار-ەوە دروستکراوەو پۆرترێتە و قەبارەکەی دوو ئەوەندە و نیوی قەبارەی ئاساییە و لەمادەی فایبەر گڵاس دروستکراوە.