لێدوانە دژ بەیەکەکانی بەرپرس و بارەگاكانی پارتی لەبارەی کاندیدکردنی فەرەیدون عەبدولقادر

8069 جار خوێندراوەتەوە کات11:34 بەروار04-06-2019
لێدوانە دژ بەیەکەکانی بەرپرس و بارەگاكانی پارتی لەبارەی کاندیدکردنی فەرەیدون عەبدولقادر


راچڵەکین- ئامادەکردنی: پشتیوان زاهیر
بەرپرس و بارەگاکانی پارتی دیموکراتی کوردستان لێدوانی جیاجیاو دژ بەیەک دەدەن لەبارەی دەنگۆی کاندیدکردنی فەرەیدون عەبدولقادر بۆ پارێزگاری کەرکوک لەلایەن کۆسرەت رەسوڵ و مەسعود بارزانییەوە، فرسەت سۆفی کە نوێنەری بارزانی بووە بۆئەوەی لەمەڕ ئەو پرسە سەردانی جێگری سکرتێری گشتی بکات لێدوانێکی جیاواز دەدات لەچاو بەرپرسانی تری حزبەکەی، هەروەها لێدوانی وتەبێژوو بارەگای بارزانیش لەوبارەیەوە یەکناگرێتەوەو دژ بەیەکن.


دانانی فەرەیدون عەبدولقادر پێشنیازی کێ بوو؟
ئەگەرچی لە هەندێک میدیا وا بڵاوکرایەوە کە دەستنیشانکردنی فەرەیدون عەبدولقادر بۆ پارێزگاری کەرکوک لەلایەن کۆسرەت رەسوڵ-ەوە بووە، بەڵام وەک فرسەت سۆفی باسی دەکات لە میانی دیدارێکدا لەگەڵ کەناڵی رووداو پێچەوانەکەی راستە، بەڵکو فەرەیدون عەبدولقادر لەلایەن بارزانییەوە پێشنیاز کراوە، سۆفی لەوبارەیەوە دەڵێت: "سەرۆک بارزانی رایگەیاند لە پێناوی ئەوەی بە زووی بگەینە رێککەوتنێک، سەردانێکی فەرەیدون عەبدولقادر بکە و پێی رابگەیەنە کە سەرۆک بارزانی رازییە بەوەی ئەو ببێتە پارێزگاری کەرکووک و داوایش دەکات ئەو بەربژێری هاوبەشی سەرۆک بارزانی و کاک کۆسرەت بێت".

فرسەت سۆفی ئاماژە بۆئەوەش دەکات کە: "من لە ماڵەکەی خۆی لە هەولێر سەردانی فەرەیدون عەبدولقادرم کرد و پەیامی سەرۆک بارزانیم پێ راگەیاند. سەرەتا فەرەیدون عەبدولقادر وتی ئەگەر هەڵبژاردن لە دەستی خۆم بێت زۆر ئارەزوومەند نیم پارێزگاری کەرکووک بم، بەڵام ئەگەر من ببمە مایەی رێککەوتنی پارتی و یەکێتی، کێشەیەک حەل بکەم و بتوانم هاوکار بم لە بابەتی کەرکووک و چارەسەرێک بدۆزینەوە من قبووڵمە". 

ئایا کۆسرەت رەسوڵ و بارزانی لەسەر فەرەیدون رێککەتبوون؟
رۆژی 28-5-2019 لە روونکردنەوەیەکدا مەحمود محەمەد وتەبێژی فەرمی پارتی دیموکراتی کوردستان رایگەیاند: "لەدوای ڕاگۆڕینەوە و گفتوگۆی نێوانیان، هەردوو بەڕێزیان واتە "کۆسرەت رەسوڵ و مەسعود بارزانی" لەسەر دیاریکردنی بەڕێز فەرەیدوون عەبدولقادر بۆ پۆستی پارێزگاری کەرکووک ڕێک کەوتبوون."، بەڵام فرسەت سۆفی هەر لەمیانی دیدارەکەیدا لەگەڵ رووداو کە شەوی 31-5-2019 واتە سێ رۆژ دوای ئەم لێدوانەی وتەبێژەکەی پارتی لەزاری کۆسرەت رەسوڵەوە ئەوە پشت راست دەکاتەوە کە کۆسرەت رەسوڵ وتوویەتی ئەو پێشنیازەى بارزانی لەگەڵ مەکتەبی سیاسی یەکلادەکەمەوە، لەوبارەیەوە سۆفی دەڵێت : "کۆسرەت رەسوڵ (عوسمان شوانی) راسپاردبوو قسە لەگەڵ فەرەیدون عەبدولقادر بکات. کاتێک سەردانی سلێمانیم کرد و لەگەڵ کۆسرەت رەسوول بە ئامادەبوونی عوسمان شوانی کۆبووینەوە، پەیامی سەرۆک بارزانیم دەربارەی بەربژێرکردنی فەرەیدون عەبدولقادر پێ راگەیاند، کاک کۆسرەت رەسوول بە پەیامەکە دڵخۆش بوو و وتی، "لەگەڵ مەکتەبی سیاسی یەکێتی نیشتمانی ئەو پرسە یەکلایی دەکەمەوە".

بارزانی چی بە عارف قوربانی وتبوو؟
عارف قوربانی رۆژنامەنووس و شرۆڤەکاری سیاسی لەبەرنامەیەکی کەناڵی رووداودا باسی سەردانێکی خۆی بۆ لای بارزانی کردووە کە رۆژی یەکشەممە 2-6-2019 ئەنجامیداوە دەڵێت: ناکۆکییەکەی هەیە لەسەر ئەو قسەیە، تێگەیشتنێکی هەڵە هەبوو لەبارەی ئەوەی کاک مەسعود و کاک کۆسرەت رێککەوتوون لەسەر ئەوەی فەرەیدوون عەبدولقادر ببێتە پارێزگاری کەرکووک. ئەوەی من لە جەنابی کاک مەسعود تێگەیشتووم ئەوە بەو شێوەیە نەبووە. کاک مەسعود باسی ئەوەیکرد کە کاک فەرەیدوون چووتەلای و وتوویەتی کاک کۆسرەت و برادەرانی کەرکووک رایانوایە من بۆ ئەم قۆناخە ببمە پارێزگاری کەرکووک، وەڵامی کاک مەسعودیش بەمشێوەیە بووە" من پێموتووە تۆ رفێقی منی، من تۆم خۆشدەوێ و پشتیوانیشتم، بەڵام من ئەم بۆچوونەم بە یەکێتیش وتووە و بەتۆشی دەڵێم بۆ خەڵکی دیکەش هەر ئەم رایەم هەیە، کێشەکانی ئێستای کەرکووک لەوە گەورەترن بەدانانی پارێزگار چارەسەربکرێن. راستە گرنگە پارێزگار کورد بێت یارمەتیشمان دەدات بۆ ئەوەی لەسەر هەندێ کێشەی دیکەدا زاڵبین. بەڵام لەم قۆناخەدا هەرکەسێک بکەینە پارێزگار. هەرکەسێکیش بێت، بێ دەسەڵات دەبێت، کە بێ دەسەڵاتیش بێت بەرپرسیاریەتی کەرکووک دەخەینەئەستۆی و دەیشکێنین. من رام وایە دوای پێکهێنانی حکومەتی هەرێمی کوردستان، شاندێکی هاوبەشی پارتی و یەکێتی و حکومەتی هەرێمی کوردستان بچنە بەغدا و لەگەڵ بەغدا رێکبکەون کە هەژموونی سەربازی لەسەر کەرکووک لابەرن، رێککەون لەسەر ئەوەی کە ئەم تەعریبە رابگیرێت و دەسەڵاتەکانی پارێزگاری لە کەرکووک کارابکرێتەوە بەو مانایەی ئەنجوومەن و پارێزگار بتوانن رەوشی کەرکووک ئاسایی بکەنەوە. بۆ ئەوەی ژیانی سیاسی و حیزبی بۆ هەموولایەک دەستەبەربکرێت.

عارف قوربانی دەڵێت: "کاک مەسعود وتی: "کاک فەرەیدوون وتی باشە بەس پێمخۆشە خۆیشت لەگەڵ یەکێتی قسەی بکەیت. من فرسەت سۆفیم راسپاردووە بچێتە لای کاک کۆسرەت و قسەی لەگەڵ بکات. فرسەت سۆفی رۆیشت و قسەی لەگەڵ کاک کۆسرەت کرد، وەڵامی کاک کۆسرەتیش ئەوە بووە کە کاک فەرەیدوون پیاوێکی تێکۆشەرە، بەرپرسی هەموو ئەو مەکتەب سیاسیەیە کە ئێستا هەین بەڵام منیش پرسێک بە یەکێتی دەکەم و وەڵامتان دەدەمەوە. دوای ئەوەش کاک کۆسرەت وەڵامی ئێمەی نەداوەتەوە کە ئایا بەو بەربژێرە رازییە یان شتێکی دیکە، تاوەکو ئێستا گلەیی لەئێمە بکەن بۆ کەسێک دانەنراوە". 

روونکردنەوەکەی فەرەیدون عەبدولقادر
رۆژی 29-5-2019 فەرەیدون عەبدولقادر لە روونکردنەوەیەکدا لەبارەی ئەو دەنگۆی کاندیدکردنی بۆ پارێزگاری کەرکوک دەڵێت: "پاش چەند جارێک کە بۆ پارێزگاری کەرکووک رووی دەمی لێپرسراوانی یەکێتی نیشتمانی کوردستان ئاراستەی من کراوە. هەمیشە وتوومە قبووڵم نییە. 

فەرەیدون عەبدولقادر لە روونکردنەوەکەیدا ئاماژە بەوەش دەکات کە، یەکەمجار شەوی پەلاماردانی کەرکووک لە 16ی ئۆکتۆبەردا بەڕێز ئاسۆ مامەند لەبارەگای مەڵبەند و بە ئامادەبوونی کاک کۆسرەت و مامۆستا بەکر و تێکۆشەرێکی زۆر ئەو باسەی کردەوە، کە من قبووڵی بکەم پۆستی پارێزگار وەربگرم... جارێکی تریش هەر لە کۆڕی کاک کۆسرەت و لە ماڵی خۆیان بە ئامادەبوونی کاک عارف قوربانی و مامۆستا بەکر هەمان وەڵام دایەوە، کە من ئەو کارە ناکەم. 

بەڵام عارف قوربانی ئاماژە بەوە دەکات لە دیدارەکەیدا بارزانی "باسی ئەوەیکرد کە کاک فەرەیدوون چووتەلای و وتوویەتی کاک کۆسرەت و برادەرانی کەرکووک رایانوایە من بۆ ئەم قۆناخە ببمە پارێزگاری کەرکووک، وەڵامی کاک مەسعودیش بەمشێوەیە بووە" من پێموتووە تۆ رفێقی منی، من تۆم خۆشدەوێ و پشتیوانیشتم، بەڵام من ئەم بۆچوونەم بە یەکێتیش وتووە و بەتۆشی دەڵێم بۆ خەڵکی دیکەش هەر ئەم رایەم هەیە، کێشەکانی ئێستای کەرکووک لەوە گەورەترن بەدانانی پارێزگار چارەسەربکرێن.

لەلایەکی ترەوە فرسەت سۆفی، هەر لە دیدارەکەی رووداودا ئاماژەی بەوەدەکات، "بە مانگێک پێش دەنگدان بۆ هەڵبژاردنی سەرۆکی هەرێمی کوردستان لەسەر داوای سەرۆک بارزانی پەیوەندی بە فەرەیدون عەبدولقادرەوە کردووە بۆ ئەوەی بۆ پۆستی پارێزگاری کەرکووک خۆی بەربژێر بکات، هەرچەندە فەرەیدون عەبدولقادر زۆر رای لەسەر پرۆسەکە نەبووە، بەڵام رایگەیاندووە "ئەگەر بوونی من بە پارێزگار ببێتە هۆی یەکڕیزی نێوان یەکێتی و پارتی و چارەسەری دۆخی کەرکووک ئەوا من قبووڵمە"؟. 

بارەگای بارزانی دژی بارزانی!
پاشنیوەڕۆی رۆژی 4-6-2019 "بارەگای بارزانی" لە میانی روونکردنەوەیەکدا لەبارەی دیدارەکەی عارف قوربانی و بارزانی دەڵێت: "بارزانی" د. فورسەت سۆفی ڕاسپاردووە کە سەردانی کاک کۆسرەت بکات و ڕەزامەندیی سەرۆک بارزانی لەسەر ناوی "فەرەیدون عەبدولقادر" پێ ڕابگەیێنێت. بەم جۆرە سەرۆک بارزانی و کاک کۆسرەت ڕەزامەند بوونە لەسەر ناوی بەڕێز فەرەیدوون"، بەڵام فرسەت سۆفی لە دیدارەکەی رووداودا دەڵێت: کۆسرەت رەسوڵ پێی وتم پرسی کاندیدکردنی فەرەیدون "لەگەڵ مەکتەبی سیاسی یەکێتی نیشتمانی یەکلایی دەکەمەوە". هەروەها عارف قوربانیش لەمیانی دیدارەکەیدا رۆژی 2-6-2019 لەگەڵ بارزانی دەڵێت:  بارزانی پێی وتم: "کاک کۆسرەت وەڵامی ئێمەی نەداوەتەوە کە ئایا بەو بەربژێرە واتە "فەرەیدون عەبدولقادر" رازییە یان شتێکی دیکە".

کۆسرەت رەسوڵ ئەو دەنگۆیانە رەتدەکاتەوە
رۆژی 1-6-2019 لەمیانی سەردانیکردنی بۆسەر مەزاری تاڵەبانی لە گردی دەباشان کۆسرەت رەسوڵ لە لێدوانێکیدا بۆ رۆژنامەنووسان ئاماژەى بەوەدا، "پرسی دیاریکردنى فەرەیدون عەبدولقادر بۆ پارێزگارى کەرکوک بە پێچەوانەوە باسى لێوەدەکرێت، دواى ئەوەى بریاردرا ئەو پرسە لەگەڵ بارزانى چارەسەر بکەن، هەوڵەکانیان بۆ ئەو مەبەستە دەستپێکردووە"‪.‬

جێگری سکرتێری گشتی یەکێتی وتیشی: ئاماژەى بەوەشکرد، دواتر ساردى کەوتە پەیوەندییەکانى پارتى و یەکێتى یەوە، پاشان چاوى بە مەسعود بارزانى کەوتووە، بەڵام باسیان لە دانانى فەرەیدون عەبدولقادر بۆ پارێزگارى کەرکوک نەکردووە‪.‬ جەختیشیکردەوە، دەبێت پرسی کەرکوک چارەسەر بکەن و ئەوان لەگەڵ چارەسەرکردنیدان‪.‬