"لە مەودوا ھەرکەس لەگەڵ شاسوارعبدولواحید بمێنێتەوە گومانی ئەوەی لێ دەکرێت مەلەفی ھەبێت"

1334 جار خوێندراوەتەوە کات05:06 بەروار24-04-2019
 
راچڵەكین 
 
 
پەرلەمانتارێكی فراكسیۆنی گۆڕان لەپەرلەمانی كوردستان رایدەگەیەنێت، پشتیوانی پەرلەمانتارەكانی نەوەی نوێ دەكەین و ئومێدەوارم خۆیان دەست پێشخەربن لە داواکردنی ھەڵوەشاندنەوەی نەوەی نوێ و دادگایی کردنی شاسوارعەبدولواحید. 
 
گۆران ئینزیبات، پەرلەمانتاری بزووتنەوەی گۆڕان لە هەژماری تایبەتی خۆی لەفەیسبوك نوسیویەتی "لە مەودوا ھەرکە س لەگەڵ شاسوارعبدولواحید بمێنێتەوە گومانی ئەوەی لێ دەکرێت مەلەفی ھەبێت، پشیوانی سەرجەم لە پەرلەمانتارە بەڕێزەکانی ئە و جوڵانەوەیە ئەکەم کە ھەر یەک لەوانە نوێنەری کۆمەڵێک لە خەڵکی کورستانن"
 
 
ئاماژەی بەوەشكردووە، "ئەم کارەی بەرامبەر ئەوان کراوە دوورە لە ھەموو ئادابێکی گشتی کۆمەڵگا و لێدانە لە دامەزراوەیەکی گرنگی وەک پەرلەمان بۆیە بە ھەموو شێوەیەک ئیدانەی ئە و کارە قێزەوونە ئەکەم و برادەرانی نەوەی نوێ ئومێدەوارم خۆیان دەست پێشخەربن لە داواکردنی ھەڵوەشاندنەوەی نەوەی نوێ و دادگایی کردنی شاسوار "
 
 
قسەكانی گۆڕان ئینزیبات لەكاتێكدایە، ئەمڕۆ شادی نەوزاد پەرلەمانتاری فراکسیۆنی نەوەی نوی لە پەرلەمانی کوردستان لە کۆنگرەیەکی ڕۆژنامەوانی ڕایگەیاند "لەسەرەتای دروست بونی جوڵانەوەکەوە چەندین خۆبەخش و ئەندامی باڵای نەوەی نوێ لەشارەکانی دیکەی کوردستانەوە هاتونەتە سلێمانی و بۆ بەڕێوەبردنی کۆبونەوەکان و بانگەشەکانی هەڵبژاردن و کاری حیزبی لە شوقەکانی گوندی ئەڵمانی و کابینەکانی نێو چاڤی لاند ماونەتەوە، بەڵام بەداخەوە بەشێوەیەکی نهێنی وێنە و ڤیدیۆیی تایبەتیان گیراوە لەلایەن باندەکەی شاسوارەوە".
 
 
ئاماژەی بەوەكرد، "لەژێر دەسەڵاتی پارتی و یەکێتیدا ئەو جۆرە هەڕەشانەمان لێدەکرێت و ئەو باندەش هەڕەشەیان لە خۆم و ئەندامە ناڕازییەکانی نەوەی نوێ و ئەندامانی ئەنجومەنی باڵای جوڵانەوەکە کردوە و بەشەخسی نامەیان بۆ من ناردوە و پییان وتوم "چاوەڕوانبە لەوەش خراپتر دەکەین و فلیمی روتت بڵاو دەکەینەوە"
 
پەرلەمانتارەكەی نەوەی نوێ جەختی لەوەكردەوە "ئەوەی دەگوزەرێت باندگەراییە و شاسوار سەرۆکایەتیان دەکات، بەهۆی ئەو هەڕەشانەوە سکاڵا لەسەر شاسوار دەکەم لە دادگا و چونکە هەڕەشەی لێکردوین".
  
 
تەئكیدیشی لەوەكردەوە "شاسوار و باندەکەی نەوەی نوێ نین و ئێمە نەوەی نوێی راستەقینەین و ئێمە دامان مەزراندوە و دەستی لێ هەڵناگیرن و هەموو ئەو کەسانە دەپارێزین کە بەوجۆرە هەڕەشانە دەیانەوێت ژیانیان بخەنە مەترسییەوە".