ئاری: ژنەكەم بە مۆبایل قسەی سێكسی لەگەڵ كەسێكی تردا دەكرد

14507 جار خوێندراوەتەوە کات02:14 بەروار02-03-2019
ئاری: ژنەكەم بە مۆبایل قسەی سێكسی لەگەڵ كەسێكی تردا دەكرد

راچڵەكین- هەولێر

ئاری ( ناوێكی خوازراوە) وەك خێزانێكی ئاسایی لەگەڵ هاوسەرو دوو منداڵەكەیاندا، ژیانیان بەسەر دەبرد، تا ئەو رۆژەی بەچاوی خۆی " خیانەت"ی هاوسەرەكەی دەبینێت، ئیتر ئەوە دەبێتە سەرەتای ئەو دۆزەخەی كە دواجار بەهەڵوەشاندنەوەی خێزانە چواركەسییەكەیان كۆتایی هات.

مانگی شوباتی ساڵی ٢٠١٨ كەسیك بەناوی ( ئاری ) لە ڕێگای مۆبایلەوە پەیوەندی بەپارێزەرێكەوە دەكات و دەردەدڵی خۆی بۆ دەكات، داوا دەكات ڕووبەڕوو لەگەڵ پارێزەرەكە دابنیشن.

رێبین سەباح- ئەو پارێزەرەی شاری هەولێر كە دۆسێیەكەی (ئاری) لەبەردەستدا بوو تا كۆتایی بە راچڵەكین-ی راگەیاند، كاتێك بۆ یەكەمجار ئاری بینیوە باسی لەوە كردووە بە چاوی خۆی و بەبەڵگەوە دیویەتی ژنەكەی لە ڕێگای مۆبایلەوە ناپاكی لێكردوە.

ئاری وتوویەتی، دوای ئەوەی لە ناكاو گەڕاوەتەوە ماڵەوە،  بە ئەسپایی چووەتە ژووری خەوتنەكەیان، لەوێ گوێی لە هاوسەرەكەی بووە كەلەگەڵ پیاوێكی تردا قسەی سێكسی كردووە.

 رێبین-ی پارێزەر دەڵێت، ئاری ئاماژەی بەوەكردووە:"دوای رووداوەكە لەگەڵ هاوسەرەكەمدا بووە بەشەڕمان، هەر بۆیە بە زۆر مۆبایلەكەم لە ژنەكەم وەرگرت و ڕەوانەی ماڵی باوكیم كردەوە."

رێبین دەڵێت، لەو حاڵەتەدا ئاری بەڵگەی تەواوی ناپاكی ژنەكەی لابوو دەیتوانی بیداتە دادگا و بە تۆمەتی "ناپاكیی" سكاڵا لەسەر دایكی منداڵەكانی تۆمار بكات، بەڵام لە میانەی گفتوگۆمان لەناو نوسینگەكەمدا ئاری بۆ پاراستنی كەسایەتی و سومعەی منداڵەكانی بۆ ئەوكات و بۆ داهاتوش بڕیاری دا لە پۆلیس سكاڵا لەسەر ژنەكەی تۆمار نەكا و بەرامبەر بەوەش ژنەكەی ڕازی بوو لە تەواوی مافەكانی خۆی خۆش بێت و داوای هیچ نەكا.

رێبین سەباح دەڵێت:  من وەك پارێزەرێكی ئەو دۆسیەیە ئەمەم پێ باش بوو هانم دان كە بەو شێوەیە ڕێكبكەون، هەر بۆ ئەو مەبەستەش لە یەكەم دادبینی ئەو دۆسیەیەو لە دادگایی باری كەسی هەولێر بۆ مەبەستی جیابونەوەیەكی بەڕێكەوتن و بێدەنگی نێوانیان، داوامان لە دادوەر كرد داواكەمان بۆ دوابخات تاوەكو بتوانین ئەو كارە ئەنجام بدەین، ئەوەبوو بەر لە نەورۆزێ ۲۰۱۸ بە ئامادەبوونی هەردوو لایەنی ژن و پیاو دوو شایەت لە نوسینگەی پارێزەری خۆم بە ڕێكەوتن ئاری ژنەكەی خۆی تەڵاق داو ژنەكەش تەڵاقەكەی قبوڵ كرد لە تەواوی مافە یاسایی و شەرعیەكانی خۆی خۆش بوو."

رونیشیكردەوە:" دواتر لە دادگا ئەو كۆنوسی تەڵاق و ڕێكەوتنی نێوانیانیان پەسەند كراو بە شێوەیەكی شەرعی و یاسایی ئاری و ژنەكەی پەیوەندی هاوسەرگیرییان لە نێوان نەما، كوڕو كچەكەشی ئێستا لای دایكیان دەژین و هەفتەی ۲٤ كاتژمێریش لای ئاری دەبن."

ئەو پارێزەرە ئاماژە بەوە دەكات پرسیارو خەمەكە لەوەدایە ئایا مۆبایل بۆ ئەوە دروست كراوە تۆ بچی لە ڕێگای مۆبایلەوە ناپاكی لە مێرد یاخود ژنەكەت بكەیت و ماڵ و ئایندەی خۆت و منداڵە بێ تاوانەكانت بسوتێنی و تا لە ژیانیش مابی شەرمەزار بی لەبەردەم خانەوادەو مناڵەكانت.